Riba dia 27 augustus 2015 tawatin un cantidad di videonan ta circula di e acontencimentonan pafor di parlamento pero aparentemente e cameranan no ta wordo maneha pa autoridad policial. Ademas ta parse cu e cameranan ta den man di e departamento di prensa di gabinete Mike Eman. Y ta mustra cu e grabacion ta wordo duna na autoridadnan na forma masha selectivo, pasobra ta solamente loke ta combini e gobierno di AVP, nan ta duna na ministerio publico.

Den cuadro di esaki fraccion di MEP a hasi diferente pregunta na Minister di asuntonan general y di husticia.

Fraccion di MEP kier wordo informa riba entre otro ken ta esnan cu a instala esakinan, e proposito di e camaranan y e costo envolvi den e projecto. Ademas e ta hopi importante pa haya sa si encaso un destaho publico a tuma lugar pa esaki. Adicionalmente a pidi e documentonan relavante pa por husga esaki.

Segun informacionan ricibi e camaranan no ta wordo opera pa cuerpo policial y pa e motibo ey fraccion MEP kier wordo informa door di ken. Tambe a hasi pregunta relaciona cu protocolnan cu tin cu wordo sigui y e afspraaknan hasi cu autoridadnan husticial pa loke ta trata e contenido di videonan.

Tawata hopi raro cu e videonan tawata circula di biaha riba medianan sociaal y pesey fraccion MEP kier haya informacion con nan a sali. Nos ta spera cu nos preguntanan por wordo contesta mas pronto cu ta posibel.

Expresionnan haci den e articulo aki no necesariamente ta refleha opinion di ArenaPoliti.co