Manera ta conoci 27 augustus ultimo nos autonomia financiero a wordo entrega na gobierno di reino y e tarea di control financiero a wordo traspasa pa CAFT. En conexion cu esaki e status autonomo di parlamento y derechonan constitucional di cada parlamentario ta wordo mina.

Fraccion MEP ta di pensamento cu tawata tin otro forma pa gobierno di Reino yega na supervision sin cu esaki lo mester a bai contra e spirito di nos Statuut y Staatsregeling. Ta di lamenta cu Gobiernonan di tanto Hulanda y Aruba a scoge e ruta cu mas ta atacha nos autonomia financiero.

Ademas di esei Fraccion di MEP a vocifera tambe cu presidente di parlamento riba dia di tratamento di LEY CAFT dia 27 di augustus ultimo a permiti gruponan di personanan desconoci y arma drenta edificio di parlamento poniendo bida di tur integrantenan di nos fraccion na peliger. Ta di lamenta cu te dia di awe no a hasi ningun investigacion riba e sucedido aki. Tanten cu e violacion di nos leynan y nos democracia den parlemento no haya e atencion debido, fraccion di MEP ta manda un senjal cu locual a pasa dia 27 di augustus ta inaceptable.

Pa e motibonan ariba menciona fraccion di MEP lo no ta presente riba dia di inauguracion di aña parlamentario nobo. Momentaneamente a dicidi pa no drenta e edificio te ora cu por garantisa seguridad di tur nos miembronan.

Fraccion di MEP no kier falta respet na Gobernador y pesey a informa Gobernador di esaki di antemano. Asina kier evita manera cu AVP a falta respet pa Gobernador den pasado. Mike Eman algun anja pasa a warda te ora cu Gobernador a drenta sala pa el'a cana drenta su tras. Anja pasa tambe e fraccion di AVP a bai bisti full na preto como protesta contra Gobernador. Fraccion di MEP no ta mustra un protesta contra Gobernador sino mas bien contra e falta di democracia den Parlamento. Mientras tanto e fraccion di MEP lo intensiva su accionnan pa yuda esnan cu mas mester di dje.

Expresionnan haci den e articulo aki no necesariamente ta refleha opinion di ArenaPoliti.co