ORANJESTAD – E siman cu a pasa Aruba a haya bishita di e ex futbolista internacional Aaron Winter, actual Embahador di WorldCoaches, cu ta un programa di KNVB pa yuda entrena coachnan den paisnan den desaroyo. E delegacion a consisti tambe di Johan van Geijn, Director di e organisacion Wereld Coach. E ultimo aki hunto cu Aaron Winter a bishita e mini cancha deportivo, cu yerba artificial, na Centro di Bario Brazil y a combersa cu Prome Minister Eman riba e bentahanan di e tipo di canchanan aki y e vision di e mandatario pa construi e terenonan aki den barionan di Aruba.

Leo de Hertog, coordinador di Movecion den Barionan, a compaña e delegacion Hulandes durante nan bishita na Aruba. El a splica cu actualmente FCCA y BoBario ta trahando riba un plan pa construi 4 di e veldnan den diferente bario, mas tanto posibel cerca di centronan di bario. Ta bay trata pa traha algun mas (6) cu apoyo di KNVB y otro instancianan.

De Hertog a splica cu mester mira e proyectonan aki den e totalidad di nan contexto. Esta cu e veldnan di Mike no ta bon solamente pa futbol pero tambe pa e aspecto social. Esaki pa motibo cu nan no ta wordo uza solamente pa practica futbol, pero den oranan di dia ta wordo uza tambe pa scolnan y merdia door di NSO (Na Schoolse Opvang) y otro organisacionnan. Di otro banda, nan por wordo gehuur den oranan di anochi y e placa aki mes ta wordo uza pa nan antencion.

E cancha na Centro di Bario Brazil ta hopi popular y continuamente ta ocupa. E siman aki a cuminsa cu construccion di un cancha asina na Bushiri, mientras cu RCA tambe a traha uno similar riba su propio forsa. E ta algo cu Gobierno ta encurasha. E vision ta practicamente similar, pero Gobierno di su banda ta pone hopi enfasis cu e veldnan aki mester ta algo cu ta beneficia e hendenan di e bario en general, incluso e por wordo uza door di scolnan y habitantenan di e bario mes.

Expresionnan haci den e articulo aki no necesariamente ta refleha opinion di ArenaPoliti.co