E obhetivo di gobierno no mester a keda limita na solamente upgrade e infrastructura di Caya Betico Croes y centro di Oranjestad pero tambe percura pa stimula fluho y movecion pa asina laga negoshinan y trahadornan haya un mihor porvenir. Ta un hecho cu e tramnan tey caba pero no ta kita afor cu esaki a afecta caya severamente lagando bentanan cai. Es mas durante e bishita cu nos a realisa den Caya e  comerciantenan y trahadornan a laga sa cu mayoria no ta baha di e tramnan pa hasi nan compras. E ora e pregunta ta: kiko tawata e balor agrega di tram? Unda e prosperidad di Caya Betico Croes a keda? 

Pa colmo den e siman cu a caba di transcuri centro di Oranjestad a sera conoci cu parkeermeters. Gabinete Eman acaso no a siña su les? Of e ansha pa placa ta asina feros? For di empleadonan nos por a compronde cu ademas di e peso financiero cu e ta forma pa nan mensualmente nan ta preocupa cu e cobransa ta stroba cliente di yega e tiendanan pa por bende. Pa loke ta e punto di bista di mayoria comerciante ta cu introduccion di parkeermeters NO ta contribui cu progreso di Caya Betico Croes. Loke nan a enfatisa riba dje ta cu e tram mes a afecta nan benta pa awor haya un di dos golpi cu e parkeermeternan. No mester lubida cu ta importante pe negoshinan por draai pa asina nan por paga nan trahadornan tambe. Den e dianan di siman diasabra ta e dia cu mas ta bende segun comerciantenan. Pero lamentablemente esun cu a pasa lo bai den historia como un di e dianan mas slow pa comercio. Asina aki Pueblo por conclui pa su mes kiko ansha pa placa ta cabando cu centro di cuidad. 

Loke ta di lamenta si cu bo ta tende For di esnan cu : Kiko ta 2 of 4 florin pa parkeer? Nos no mester lubida cu comunidad di Aruba ya caba ta wordo castiga cu yen medida cu ta afectando su poder di compra. Dus cobransa pa parkeer logicamente lo tin su efecto. Kizas hopi lo no ta di acuerdo cu nos ora di bisa cu placa di parkeer lo por a bai na un otro necesidad. Pero lagami duna algun ehempel con bo por a usa bo placa  (florinnan) cu ta bai den parkeermeters:
2 ora = kipashi (3,65)
3 ora = caha di webo (5,99)
4 ora = 1 kipashi + 1 paki jonge kaas sliced + 1 paki ham sliced (aprox 9 florin) 

Pa e trahadornan cu tin cu paga 75 florin tur luna. Esaki sigur por a bai na gasoline, na compras, paña pabo jiunan etc. E punto central di esaki ta  cu kier of no e forma dictatorial pa obliga tur hende paga tin su efectonan amargo y negativo pa esnan cu no tine financieramente bon. Pesei e ta keda incomprendibel pakiko Gabinete Eman no a cuminsa na demostra e ehempel y corta  na gastonan innecesario enbes di sigui castiga e poder di compra di e clase trahador.

Expresionnan haci den e articulo aki no necesariamente ta refleha opinion di ArenaPoliti.co