Nos a tuma nota di un articulo di un parlamentario di AVP den cual e ta gaba cu Gobierno tabata e motor tras di crecemento economico na nos Pais, ya cu inversion di sector priva mes a keda atras debi na inseguridad riba mercado internacional. Manera a para bira custumber, e parlamentario di AVP aki tin problema pa bisa e berdad y nos mester coregie promer cu e keda ripiti e engaño. E inseguridad cu ta reina na nos Pais y cu ta stanca nos economia no ta debi na factornan internacional. Ta e mal maneho financiero di Gabinete Eman ta locual ta pone cu sector priva tin miedo pa inverti.

Mal maneho financiero ta trece medida y cune inseguridad
Ta hustamente door di e mal maneho financiero di Gabinete Eman hopi instancia y inversionista a perde confiansa den nos Pais. No ta pornada Fitch y Standard and Poor’s a degrada e rating di nos Pais y no ta pornada IMF y CFT ta cuestiona e credibilidad financiero di nos Pais. Ta e mal maneho financiero di Gabinete Eman a hiba nos te na e extremo cu nos Pais mester a bay bou di curatela di Hulanda. E curatela aki ta trece cune e promesa di Gabinete Eman pa implementa 24 medida pa drecha e finanzas publico. Pero como cu tin tanto gañamento di parti di e gobierno aki y e parlamentarionan cu ta sostene, tin un inseguridad grandi ta reina pa e efecto cu e medidanan aki lo tin pa e poder di compra di Pueblo y tambe pa e ‘cost of doing business’ pa inversionista. E inseguridad aki ta locual ta paralisa inversionannan priva den e economia di nos Pais.

Gobierno a inverti menos di 1% di tur e fondo publico
Ta remarcabel cu e parlamentario di AVP ta bisa cu gobierno tabata e motor tras di inversion na Aruba , ya cu esaki no ta cuadra cu realidad tampoco. Ta parce manera cu nan no a compronde locual tin para riba pagina 10 di e rapport di CFT di 12 september 2014, De investeringen vanuit de overheidsbegroting zijn gedurende de hele periode laag gebleven en uitgekomen op minder dan 1% van de totale uitgaven in 2014. E frase aki ta indica cu den e 4 añanan di gobernacion di Gabinete Eman, di tur e placa cu nan a gasta, menos di 1% a bay pa Pueblo. Asina mes cu Gabinete Eman a yega haya mas di 400 miyon cu Gabinete Oduber a laga atras den caha di gobierno na 2009, asina mes cu nan a fia te redobla e debe di nos Pais, asina mes menos di 1% di e 2000 miyon florin ey a bay pa Pueblo. Pesey pa bisa cu Gabinete Eman tabata e motor tras di inversion na nos Pais ta un mentira flagrante.

Sinceridad ta crea confiansa
Pa nos economia por crece, nos gobierno mester inspira confiansa y decicionnan mester wordo tuma. Gabinete Eman a demostra cada ves cu nan no ta di confia, ya cu nan ta keda sconde of manipula cu informacion pa asina evita di bisa e berdad of tuma un decicion. Tur e mentiranan aki, incluso e promesa pa Elmina BBO, no ta tuma medida, plan pa balanced budget, CFT over my dead body, etc etc ta pone cu e confiansa di inversionista ta keda perdi y cu esaki nos economia lo keda stanca. Pa e economia di nos Pais por florece atrobe, Gabinete Eman mester bay y Pueblo mester pone hende sincero y honesto pa goberna e Pais aki. AVP nunca mas!


13 september 2015

Expresionnan haci den e articulo aki no necesariamente ta refleha opinion di ArenaPoliti.co