Den conferencia di prensa di dialuna ultimo nos fraccion a elabora ariba espacio aero di nos pais. Nos por mira un otro acto cuestionabel encuanto nos autonomia un bes mas, pero e biaha aki mi ta referi na nos espacio aereo. Ta asina cu Minister Otmar Oduber tabata na punto di bolbe comete un otro eror, door di entrega un parti di nos espacio aereo. Esaki ta debi cu na 2010 el’a firma un protocol contra tur conseho y asina entrega nos espacio aereo na Corsow. Cual por cierto un protocol cu ainda ta valido y por keda ehecuta na cualkier momento.

Protocol 2010
Cada un di e islanan ABC tin nan mesun espacio aereo pa locual ta trata acercamento di avionnan, cual porcierto Aruba ta cobra un suma cerca e aerolinianan. Corsow ya caba ta controla Boneiro su espacio aereo, y si ehecuta e protocol aki lo haci cu Corsow lo controla espacio aereo di Aruba tambe. Den tur e islanan ABC, Aruba ta esun cu ta produci mas vuelo. Pueblo mester ta informa cu un protocol a wordo firma na 2010 y ta encera entre otro cu Corsow lo a bin cu un organisacion cu lo a controla Aruba su espacio aereo cu consecuencia cu nos lo perde control di nos propio espacio aereo. Esaki ta nifica cu e protocol aki ta duna Corsow control pa maneha Aruba su espacio aereo na nan antoho. Actualmente e protocol aki ta riba un "stand by", pero e ta completamente valido y por keda ehecuta libremente.

Perdemento espacio aereo
Aparentemente no mucho dia pasa, pa ta exacto dia 1 di September 2015 Gobierno tawata tin e intencion di haci un "try out" pa cu e protocol aki. Mi ta puntra mi mes ki intencion Gobierno di Aruba tin tras di e decision di haci e "try out" aki? E ta un hecho cu afiliando Aruba na e organisacion aki ta nifica cu lo tin di bay sigui regala mas parti di nos autonomia na paisnan den Reino Hulandes. Si dado caso gobierno di Aruba dicidi cu lo bay over na permiti cu e organisacion aki controla nos espacio aereo, esey lo nifica tambe cu algun trahador Arubiano lo por perde trabou of lo mester bay biba na Corsow pa sigui eherce e trabou cu nan tin actual. Pues, si e "try out" aki a bay door y tur cos bay bon, nos lo perde nos espacio aereo kedando asina cu unicamente toren di control pa traha cune. Nos tur sa cu Aruba ta depende primordialmente riba turismo. Y si nos duna Corsow acceso pa controla nos espacio aereo, esey ta nifica cu nos lo pone nos economia principal den nan man atrobe.

Situacion inacceptabel
Ora cu e luchtverkeersleidernan  a haya e opdracht aki for di Gobierno pasobra ta minister Otmar Oduber a firma e protocol aki, ta mas cu logico cu nan a rechasa esaki completamente. Ademas cu nan a tuma nota di e esencia di e "try out" aki, nan a opone rotundamente y nan a manda un carta bek como contesta cu ta contene diferente punto totalmente valido pa loke nan ta contra dje y a par’e di biaha. Realidad ta cu e situacion aki ta uno inacceptabel teniendo na cuenta cu e intencion tras di e protocol aki ta principalmente di kita autonomia di espacio aereo for di Aruba. Tawata for di 2010 cu kier a ehecuta e plan aki pero el’a keda paralisa pa un tempo y awor aki Minister Oduber, pa medio di su lider di campaña sr. Nilky Kock (Director di ANSA N.V.) kier finalisa e plan aki pa sigui kita mas autonomia for di nos. Mester remarca cu si e Gobierno di AVP sigui den rumbo aki, Dios spaar nos pa tocante kico lo resta pa nos hobennan den futuro.

Expresionnan haci den e articulo aki no necesariamente ta refleha opinion di ArenaPoliti.co