Minister Otmar Oduber a reuni cu secretario general di UNWTO Dr. Taleb Rifai 

Minister Otmar Oduber tabata di 21 Asamblea General di World Tourism Organisation, UNWTO,  na Medellin, Colombia. Un total di 1000 participante unda mas di 110 nacion tabata presente di cual 72 Minister y secretarionan general a atende e asamblea aki.

A probecha e momento pa reuni cu e secretario general di UNWTO Dr. Taleb Rifai. E reunion tabata uno fructifero di cual Minister Oduber y Dr. Taleb Rifai, a toca diferente tema importante pa loke ta turismo na Aruba. A papia di e importancia di turismo pa specialmente e region di Caribe, y sigur Aruba. Sr. Oduber a splica detayadamente e desaroyo unico di Aruba su turismo y e enfoke cu nos ta hibando awor, riba e conexion entre turismo y cultura, cual ta cuadra cu e vision di e organisacion mundial di turismo cu ta mira e importancia den esaki. E ehecutivonan a combersa tambe riba UNWTO su pensamento riba e balansa entre desaroyo turistico y e industria petrolero, y con por acopla esaki nan na otro. UNWTO ta conta cu experticio riba e area aki y Sr. Rifai a comparti su pensamento nan inicial.

Aruba a wordo nomina como e miembro cu lo representa e miembronan UNWTO den e aspecto di turismo y competitividad, cual ta demostra cu Aruba a sa di semper keda desaroya nos isla, pa keda dos stap dilanti di tur otro destinacionnan den nos region. Esaki sigur ta un logro grandi pa nos isla y alabes un oportunidad excelente. Aruba awor lo traha hopi di cerca den e organisacion di UNWTO ofreciendo conseho den e aspecto aki.

Durante e reunion cu e Secretario General di World Tourism Organization (UNWTO) Dr. Taleb Rifai, a confirma di lo ta presente na Aruba pa un conferencia special di Turismo otro aña September. Cu e presencia di Dr. Rifai den e conferencia riba nos isla lo permiti Aruba pa presenta su mes di e manera aki tambe, riba e plataforma internacional.

Minister Otmar Oduber a ofrece tur sosten di parti Aruba pa crea laso nan mas estrecho entre e paisnan den region, UNWTO y su miembro nan. Caribe, y Aruba specialmente, su dependencia riba turismo ta uno halto y pesey ta importante pa nos ta mas presente riba nivel global.

Expresionnan haci den e articulo aki no necesariamente ta refleha opinion di ArenaPoliti.co