Benny Nisbet (PPA): "Vision pa muda containerhaven for di Oranjestad pa Barcadera ta exclusivamente di partido PPA"
![Nisbet01](/images/779x490/Nisbet01.jpg)
Cu atencion partido PPA ta tuma nota con gabinete Eman representa pa Ministro Presidente Mike Eman y ministro di economia encarga cu APA NV sr. Mike de Meza alias THE MESS ta gaba awe cu e mudamento di Containerhaven for di Oranjestad pa Barcadera lo ta nan vision.
Esaki simpelmente NO ta berdad……!! E vision entodo caso ta di PPA y hasta AVP a posesiona su contra bisando cu e vision cu e tempo ministro Benny Nisbet a presenta den parlamento lo ta mucho grandi y lo ta mucho costoso.
E HISTORIA DI MUDAMENTO DI CONTAINERHAVEN !!
Na 1986 mi tabatatin e placer di tabata e prome ciudadano nombra como Ministro di Transporte y Comunicacion y na mes momento presidente comissario di APA NV. Durante e periodo ey mi a tuma nota di e haf di Barcadera cu NO tabata worde usa mucho. Den decada 60 bao di liderato di Ministro di Finanzas y Fomento di Antiyas Neerlandes sr. Juan E. Yrausquin a larga coba e haf di Barcadera y a logra pa un compania esta A.C.I. Arube Chemical Industries cuminsa funciona den e haf cu a worde titulo e Segundo haf di Industria di Aruba. Despues di un 16 anja Aruba Chemical Industries a sera nan porta y diferente gobierno NO a logra crea un desaroyo pa e haf aki. Mi a cuminsa papia riba e topico aki den seno di PPA y tempo a pasa, PPA mester a bandona gobierno.
Na 1989 PPA a regresa y mi mes a regresa den e function aki na 1993. Ta e tempo ey mi a presenta mi vision pa desaroyo di haf di Container na Barcadera creando mas espacio pa desaroyo di cruise etc na Oranjestad. Na januari 1994 mi a duna E.C.T. (Europe Container Terminal) e tarea pa cuminsa hasi e prome studio pa muda e haf di Container for di Oranjestad pa Barcadera. Ni den mi propio gobierno Ni den parlamento nan no tabata kere mucho den e vision aki. Den parlamento Lider di Oposicion(AVP) a declara…..’mucho grandi mucho costoso’. Mientras cu ainda costonan no tabata riba mesa ….a firma pa e studio tuma lugar.
Despues den anja 198/1999 AVP a purba horta e vision splicando pueblo cu ta nan vision y mi a bringa esey den prensa ….y AVP a keda keto pero no a bai over na ejecuta e vision aki. Tempo di AVP/OLA nan a trece un grupo Cubano y tempo di MEP nan a trece un grupo spanjo.
For di oposicion mi persona den nomber di PPA a keda mustra e importancia di e vision/projecto aki. Nos mester tin un 30 declaracion unda PPA for di oposicion( 2001-2005) (2006 pa 2009) a keda mustra riba e impacto positivo cu mudamento di Containerhaven lo tin y cu esaki lo ta den cuadra di un vision mas grandi di PPA esta pa hasi Aruba un HUB den Caribe.
Anjas a pasa y e responsabilidad a keda move entre AVP pa MEP, MEP pa AVP….y PPA den nos ultimo programanan a mustra con pa desaroya Barcadera/Hub/Gateway:
A. Muda haf di Container for di Oranjestas pa Barcadera. studio upgrading pa ‘post panama vessels’,
B. Barcadera Zona Liber(Free zone)
C. Aruba World Trade Center,
D, Mehoracion di e fascilidad di Cargo na Aeropuerto,
E. Hub pa Pasahero y Carga,
F. Completa Ringweg 3, Expansio Highway San Nicolas-Oranjestad,
G Centro di Reciclahe.
Si analisa locual ta tumando lugar awe mester conclui cu ta programa di PPA en grande ta worde ejecuta pa AVP su gobierno. Solamente e vision aki mester a worde ejecuta entre 95 pa 2005. Cu otro palabra 20 anja laat ta ejecuta e vision di PPA/Benny Nisbet, cu nan gusta of no.
E FALTA DI VISION SERCA AVP !!
AVP NO tabatatin ningun vision pa mudamento di Containerhaven for di Oranjestad pa Barcadera…hasta nan no a tene cuenta mes cu desaroyo den region. Si esey tabata e caso anto ora Valero na 2010 a informa gobierno di Aruba cu si nan habri e refineria cu tur probabilidad esaki lo ta pa algun anja ….anto gobierno di AVP mester a exigi e momento cu un parti substancial di e haf di San Nicolas lo a retorna den man di pueblo. Pa motibo cu na 2006/2007 Panama a cuminsa riba e ‘slotnan’ nobo di nan panama canal. Esey ta trece cunele cu e barconan mas grandi esta e ‘post panama vessels’ cu lo pasa den Caribe lo bira 366 m (1.200ft) den largura, 49 meter(160.7 ft) den hanchura y 15.2 meter(49.9 ft) den profundidad. Cual ta hasi cu e haf cu ta ricibi nan lo mester ta un 16 meter hundo, cual NI oranjestad, NI Barcadera ta. Tumando un parti di e haf di San Nicolas esta Sea Berthnan bek un parti di containerhaven lo por a bai den haf di San Nicolas…..y San Nicolas lo a ricibi un desaroyo nobo, pero lastimamente AVP no tabatatin e vision ey …e momento ey internamente nan a cuminsa realisa cu e vision/projecto di PPA/Benny Nisbet cu nan a rechasa tabata bon y nan lo a bai ejecuta esaki, pero pa nan ‘update’ e vision nobo cu e desaroyo nobo di e impacto di Panama canal AVP NO tabatatin e expertisio NI e vision pa cu esaki. Ta PPA mes lo mester a ‘update’ esaki pa futuro.
Aruba, 16 di September 2015
Lider Politico di PPA
BENNY NISBET
Expresionnan haci den e articulo aki no necesariamente ta refleha opinion di ArenaPoliti.co