Na eleccion di 2009 mi a bin conoce señora mr. Evelyn Wever Croes mas di cerca. Nos tin casi mesun background, nos tur dos ta hurista y abogado. Hunto nos a forma parti di fraccion di MEP  cu a bay den oposicion. Evelyn  ta hopi dedica na su trabao den fraccion, e ta colegial y a demostra su capacidad y responsabilidad. Na 2011 Evelyn a wordo eligi como lider di MEP. Mi mes persona tambe a participa den e eleccion pa liderazgo di MEP y mi a sinti cu MEP tabata kier un cambio. Nos miembronan a dicidi di scoge un dama como lider di MEP. Esaki no a bin sin mas tampoco. Esaki a bin door di e confianza cu nos hendenan a demostra den Evelyn. Un confianza cu el’a logra den un tempo cortico den su carera politico. Despues nos a sigui traha hunto den parlamento hibando un oposicion fuerte y nos a bay eleccion 2013 unda Evelyn a demostra su liderazgo pa por a mantene nos partido MEP cu 7 asiento den parlamento teniendo cuenta cu tur circumstancia cu nos partido a pasa aden. Awor aki na 2015 Evelyn a madura como politico y a mustra cu e ta un politico cu por absorba hopi atake y sla politico. Contrincantenan a purba tur dia pa atacha su integridad cual ta un di su puntonan mas fuerte. Tambe den politica nacional, den Reino y internacionalmente Evelyn a crece como lider politico y mi ta convenci cu Evelyn ta cla pa asumi e liderazgo di nos pais mirando su capacidad, sinceridad y responsabilidad y mas cu tur cos su integridad. Tambe sin lubida cu e ta un persona cu ta dedica tempo di calidad na su famia y como un bon social democrata ta pone e ser humano central. Tur e puntonan describi aki riba ta pone cu sra mr. Evelyn Wever Croes mester worde eligi un biaha mas como lider maximo di MEP.

Expresionnan haci den e articulo aki no necesariamente ta refleha opinion di ArenaPoliti.co