Stephanie Croes (MEP): “Nos Lider Evelyn Wever-Croes ta scucha su pueblo y ta atende cu su dolornan”
Ora ta trata di husticia, no tin diferencia entre problemanan grandi of chikito, pasobra tur problema cu ta encera e “Ser Humano” ta importante y nos Lider Evelyn Wever-Croes semper ta pone e Ser Humano Central.
Na aña 2011 Aruba a conoce su lider nobo pa Movimiento Electoral di Pueblo, MEP. Den un entrevista na radio poco tempo despues a wordo puntra na mi persona tocante e liderazgo di nos Lider Evelyn Wever-Croes. Sin pensa dos biaha e caracteristica mas importante cu mi a menciona tawata “compasion”. Nos lider a bin ta demostra un caracter firme, respet, disciplina, honestidad y integridad. Un lider cu ta scucha y cu ta comparti cu otro p’asina realisa su metanan cu ta contribui na e bienestar di Aruba en general. Ta importante pa remarca cu politica no ta facil, Aruba ta pasando door di un etapa hopi scur y pueblo di Aruba merece di tin un lider cu ta scucha nan dolornan y cu ta atende cu nan. Un lider sin curason den mi opinion personal no por wordo considera un lider. Un lider cu curason tin compasion pa otro, y ta lucha pa su pueblo y ta duna tur cu tin pa su pais por bay dilanti. Esaki ta e liderazgo cu nos pais mester pa por sali di e abismo cu Gabinete Eman a impone riba Aruba. Como hoben politico cada dia mi ta expande mi conocemento y mi tin cu accentua e hecho cu Evelyn Wever-Croes ta scucha di grandi y chikito. Esaki ta algo cu mi ta admira hopi mes specialmente cu nos hobennan ta e futuro di mayan, pero tambe esun di awe! Cu Congreso 2015 den porta, ta di reflexiona riba e liderazgo di nos partido, unda cu sin duda nos por mira cu nos Lider Evelyn Wever-Croes a cumpli cu su promesa desde su entrada oficial den politica pa semper mantene e ser humano central. Mi ta extende un invitacion na pueblo di Aruba pa bin sostene nos lider y Movimiento Electoral di Pueblo, MEP, dia 27 di september proximo na Congreso 2015. Despues di tur tempestad, SOLO TA SALI, unicamente hunto nos por cambia e rumbo di nos pais y logra pa e SOLO briya pa un y tur riba Aruba.
Expresionnan haci den e articulo aki no necesariamente ta refleha opinion di ArenaPoliti.co