Den mi opinion personal, sra. Evelyne Wever Croes mester keda Lider di Movimiento Electoral di Pueblo (MEP) y mi ta splica pa ki motibo.

Motibonan:
Na e momento aki Aruba ta pasando den un situacion financiero devastador y pueblo di Aruba ta anhela pa un Lider cu por yuda saca Aruba for di e abismo aki. Sra. Evelyne Wever-Croes ta e unico persona cu na e momento aki por yuda saca Aruba di e situacion aki hunto cu Movimiento Electoral di Pueblo. Sra. Wever ta un persona cu a demostra desde cu el’a wordo eligi como Lider di MEP cu e ta un dama cu curashi y determinacion pa traha na bienestar di su pueblo. Sra. Wever ta un dama cu su estudio universitario, cu un titulo di Meester in de Rechten y un persona cu conocemento y experiencia riba tereno di Finansa pa hopi aña.

Sentimento di un persona:
Sra. Wever ta un persona cu sentimentonan noble, sinembargo fuerte y semper cla ora ta trata di defende nos conciudadanonan. Un dama cu hopi sentimento pa e ser humano, cu un experiencia  di 24 aña di felis bida matrimonial y sa con pa guia y lanta su 3 yiunan hoben cu bon ehempel den nos comunidad. Sra. Evelyne Wever-Croes ta un profesional cu por depende riba su propio estudio y experiencia pa cu su bida personal, sinembargo a opta y ta cla pa asumi e reto como Lider di Movimiento Electoral di Pueblo y alavez como lider di nos Pais y nos hendenan.

Experiencia personal:
Pa mi personalmente awor ta e momento cu mas Aruba mester di un Lider manera sra. Evelyne Wever-Croes. Un persona sincero, transparente, cu sentimentonan puro pa e ser humano y semper ta cla pa yuda tur hende sin pidi nada a cambio solamente pa mira e felicidad briya riba cara di cada conciudadano. Sra. Wever ta un dama cu hopi creencia den nos Señor Hesucristo cu ta gui’e, ta dun’e fe y forza pa logra e felicidad cu nos hendenan merece. Desde e promer dia cu mi a conoce sra. Evelyne Wever-Croes personalmente mi a experiencia e sentimentonan di amor y pasion cu sra. Wever tin pa nos hoben y nos grandinan. Sra. Wever semper a demostra e sacrificio pa logra su meta di traha pa nos hobennan, pa nan ta protegi, pa nan logra nan metanan mescos cu ta su propio yiunan.

Esakinan ta e motibonan cu sra. Evelyne Wever-Croes sin excepcion mester wordo reeligi como Lider di Movimiento Electoral di Pueblo y cu Dios su poder pa promer biaha den historia pa un dama como Lider maximo di nos Pais, cu na e momento aki ta nos unico alternativa pa saca Aruba di e situacion malo cu nos ta pasando aden. Na tur nos damanan, duna sra. Wever tur boso sosten como un dama representando cada un di boso y alavez na tur nos hende hombernan fuerte y trahado, sinti boso mes orguyoso  y como sifuera ta un kerida mama cu semper lo defende nos den tur situacion.

Expresionnan haci den e articulo aki no necesariamente ta refleha opinion di ArenaPoliti.co