Un paso mas serca di vision 2020 

ORANJESTAD – Ministerio di Economia, Comunicacion, Energia y Medio ambiente, ing. Mike de Meza, a cataloga e proyecto di panelnan solar na Scol Basico Kudawecha como uno sumamente bunita. Esey el a enfatisa diabierna ultimo bishitando e scol pa informa su mes di e ultimo desaroyonan di e proyecto hunto cu su colega Minister di Asuntonan General, Mike Eman. E trabounan na e scol ta pa instala panelnan solar riba e dak di e scol. Esaki ta parti di un proyecto den cua riba 15 edificio di gobierno, incluyedo 8 scol rond di Aruba, ta bay instala panelnan solar riba nan dak. E energia genera na Kudawech contribui na haci cu Aruba mas independiente di combustible fossiel, esta energeticamente sostenibel, pero tambe economicamente mucho mas sostenibel.

Minister de Meza a anuncia e mainta aki tambe cu e siguiente scol cu ta bay haya panelnan solar ta Filomena College na San Nicolas. Tur esaki ta den cuadro di Aruba su vision pa bira energeticamente sostenibel pa 2020. Minister de Meza a cataloga e proyecto aki uno bunita no unicamente pa pa motibo di e vision, pero mas bien pa e motibo cu aki e proyecto ta parti di e scol. Ing. de Meza ta enfatisa cu e hobennan ta gusta tecnologia nobo, pero di biaha nan ta wordo educa di e necesidad pa e direccion pa Aruba, pero pa mundo. “Esaki ta bay salba nos medio ambiente, e ta bay haci nos bida, socio-economico, cu ta basa riba energia, sostenibel.”

“Mundo ta wak Aruba como un modelo pa mundo, den e region aki sigur, y esaki,” segun ing. de Meza, “complementa e Green Conference fin di e luna aki.” Green Conference ta bay consisti di 4 programa. E prome ta caminda cu ehecutivonan di companianan di utilidad, minister y minister-presidentnan di sigur 15 isla den Caribe ta bini hunto. Inmediatamente su tras tin e Green Conference mes, cu ta caminda gobiernonan, comercio y universidadnan di tur rond mundo ta bin hunto. Despues di e Green Conference, ta bin ECLAC, un organisacion di United Nations, cu un dialogo tocante di Energia Renobabel. Despues di esey tin Parlatino tambe na Aruba, cu ta trece por lo menos 90 parlamentario di Latino America y Caribe di e commission permanente di Energia hunto. Tur esaki, sr. de Meza ta splica, ta pone Aruba den un posicion unico na mundo, particularmente den e region aki, caminda cu Aruba ta bira un centro di conocemento riba e topico importante aki pa mundo henter. E tema central di e conferencia aki ta bay ta “Sharing of Knowledge,” loke ta den cuadro tambe di e di tres pilar economico cu ta trahando riba dje na Aruba cu ta basa riba conocemento, “un Knowledge based Economy,” loke ta yena tambe e Hub functie cu Aruba ta trahando riba dje.

E beneficionan di e desaroyonan aki ta varios y di hopi importancia. Birando energeticamente sostenibel, Aruba ta desaroya su mes den un economia tambe sostenibel. Haciendo scolnan parti di esaki, ta inclui hoben studiantenan pa bira mas conciente di e importancia di e tecnologia aki pa medio ambiente y nan mesun futuro. E desaroyonan aki ta bira parti di nan curiculo.

Finalmente e desaroyo di ta completamente sostenibel pa 2020, ta trece cu ne cu Aruba ta bira un lider regional y mundial riba e tereno aki y compartiendo e conocemento y desaroyonan aki, ta creando tambe un pilar economico di conocemento.

Expresionnan haci den e articulo aki no necesariamente ta refleha opinion di ArenaPoliti.co