MEP: Un biaha mas CAFT a señala cu Gabinete Eman no a cumpli cu e metanan cu nan mes a propone
![111015 meerjarig kader](/images/779x490/111015-meerjarig_kader.jpg)
Despues cu CAFT a emiti su ultimo conseho riba e presupuesto 2016 na Minister di Finansa sr. Bermudez, ta mas cu visto cu e gobierno di AVP aki ta yegando den un cayehon sin salida. Despues di lesa e conseho di CAFT mester constata cu un di e problemanan di mas grandi cu Gabinete Eman ta sinta cun’e actualmente ta e gastonan di personal cu durante e ultimo 6 añanan a crece den forma espantoso. Si na 2009 e gastonan di salario di personal di gobierno tabata 315 miyon florin, esaki a aumenta na 2010 te na 334.7 miyon, 2011: 356 miyon, 2012: 381.1 miyon, 2013: 387.6 miyon y na 2014: 393.4 miyon florin. Un crecemento formal, anto hustamente esaki ta bin di e partido AVP cu den su programa “Prioridadnan pa maneho di Aruba, 2009-2013” a priminti lo siguiente: “Evalua y ehecuta e ‘Kerntakenanalyse’ di aparato di gobierno. Stop nombramento di personal. Stop contractnan innecesario of cu ta contra interes publico”. Hecho ta cu e politiconan di AVP nunca a yega di tende di e dicho “scucha mi palabranan bunita, pero no wak mi hechonan mahos”.
Gastonan di 46 miyon florin
Den un carta fecha 11 september 2015, CAFT a mustra su preocupacion caba pa loke ta e medidanan cu no a ser tuma riba tereno di personal y en especial den e categoria di “Reduccion te cu mitar di e contractantnan”. Den forma insistente CAFT ta keda mustra Gabinete Eman cu mester haci algo na e cantidad espantoso di e coordinadornan, ya cu nan gastonan di salario so ta suma na mas cu 46 miyon florin pa aña. Den su conseho di 17 di September 2015, CAFT un biaha mas a elabora riba e proceso pa reduci e gastonan di e contractantnan aki. Hecho ta cu Gabinete Eman mes a pone como meta (“Doelstelling”) cu nan lo reduci e gastonan di e contractantnan cu 28 miyon florin na 2015 y cu 30 miyon florin na 2016. Sinembargo si mira riba e tabel adhunto, den e promer 6 lunanan di 2015 Gabinete Eman a logra reduci e gastonan aki (“Realisatie”) cu solamente 3 miyon florin! Y si extrapola e cifra aki te cu fin di 2015, anto probablemente solamente 6 miyon florin so lo wordo reduci durante henter 2015. Pues e meta no ta ser logra nunca ya cu ta keda falta 22 miyon florin mas pa ser corta den e gastonan di e contractantnan aki.
Mike no por sconde mas
Cu esaki tambe Gabinete Mike Eman ta lomba contra muraya y awor mester bay inventa trikinan manipulativo p’asina splica y yora na CAFT dicon nan no a logra alcansa e meta cu nan mes a fiha den e presupuestonan di mas aña. Hecho ta cu CAFT ta hopi preocupa ya cu si pa 2015 mes Gabinete Eman no ta logra di reduci e gastonan di contractantnan, con nan lo por logra esaki na 2016? Ta pesey no ta pornada cu CAFT den su ultimo conseho a trece padilanti cu mas pronto posibel nan kier tende di gobierno di ki manera nan lo bay limita e crecemento structural di e gastonan di personal, mirando e importancia cu esaki tin pa controla nos finansa publico den un termino mas cortico.
Finalmente, e unico opcion cu ta resta Gabinete Eman pa reduci e gastonan di personal ta pa corta y baha e gastonan di coordinadornan for di 46 miyon florin te na 23 miyon florin (aunke cu pa 2015 esaki no ta alcansabel mas!) y asina cumpli toch cu nan propio meta di “Reduci te na mitar e cantidad di contractantnan”. Mike Eman, bo por a core tur tempo, pero awor si bo no por sconde mas!
Expresionnan haci den e articulo aki no necesariamente ta refleha opinion di ArenaPoliti.co