Prome Minister Eman invitado special 

ORANJESTAD - Actualmente na Aruba ta tumando luga un simposio hopi interesante y necesario cu ta trata Oncologia (Cancer) en general. E simposio aki, organisa door di oncologo dr. Jonkhoff, dr. Willemsen, dr. Daryanani y demas partner medico tanto na Aruba como Hulanda, ta unda specialistanan riba e tereno di oncologia den ki forma cu ta, ta bin hunto pa tene disursonan al caso, pa intercambia entre nan mes informacion di e ultimo desaroyonan y discuti tratamentonan nobo cu tin riba mercado y tambe papia di trials (estudionan profundo) cu ta tuma luga rond mundo pa haya e cura perfecto pa combati cancer. E simposio a start cu un encuentro ameno riba beach di Holiday Inn.

Prome Minister Eman tabata invitado special di dr. Jonkhoff na e encuentro bunita riba beach na Holiday Inn. Eman, kende a perde bon amigonan entre nan Dichi Tromp y Wubbo Ockels na e malesa horibel cu yama cancer, a habri e simposio diahuebs mainta. Durante e cocktailparty Eman a haya oportunidad pa papia cu varios specialista pa haya splicacion un poco mas amplio di nan trabou.

Luna di Oktober ta e luna cu ta wordo dedica na e malesa horibel cu yama cancer. Un luna pa conscientisa comunidad con anda di e miho forma cu su curpa, pa percura pa detecta cancer na tempo y informa su mes riba e ultimo desaroyonan den mundo. Un plataforma manera e simposio den Holiday Inn unda profesionalnan ta bin hunto ta e miho forma pa tene nan mes y e ‘pashent’ al tanto di tur loke ta pasa den e mundo aki riba tereno di Oncologia. E simposio a cuminsa diaranzon anochi cu un cocktail party pa den forma relaha esnan cu a bin Aruba pa atende y aporta na e simposio hopi interesante aki, a conoce nan coleganan di Aruba. E atendencia pa e simposio ta grandi, pasobra e enfermedad cancer ta uno cu lamentablemente hopi di nos di un of otro manera ta haya nos mes confronta cu ne. Un amigo, familiar of bon conocir cu a haya e diagnosis devastador cu e tin cancer. Simposionan asina, aparte di tin nan balor inigualabel pa mundo medico, ta tene nos tur skerpi pa cuida nos mes y stima nos mes y esnan rond di nos un poco mas. Riba diasabra, 17 di oktober 2015, e simposio ta specialmente organisa pa esnan cu kier sa mas di e malesa cancer den un idioma mas comprendibel. Tur hende ta bon bini. Pa por participa mester registra prome. Pa registra por yama e departamento di Oncologia na dr. HOH. Mirando e exito di e simposio aki, e comision kier organis’e cada dos aña.

Expresionnan haci den e articulo aki no necesariamente ta refleha opinion di ArenaPoliti.co