ORANJESTAD- Prome Minister Eman a habri e simposio di Oncologia diahuebs mainta dilanti un audiencia grandi consistiendo di mediconan, enfermeronan, analistanan medico, otro profsionalnan riba e tereno aki local. Un parti grandi di esnan presente a bin di exterior pa sea hiba un discurso medico of scucha kico ta e ultimo desaroyonan den diagnosticacion di cancer, tratamentonan nobo cu tin riba mercado y estudionan di ultimo tempo. Prome Minister Eman no ta un medico, pero si un persona cu un curazon grandi cu ta stima su prohimo. Un persona dedica na yuda esnan cu ta sufri di cualkier enfermedad. Un persona cu a perde bon amigonan na e enfermedad cancer. El a pasa hopi tempo cu nan, a haci loke e tabata por, pero su amigonan mester a entrega spada na e enfermedad devastador aki.

Den su discurso Prome Minister Eman a elogia e comision organisador, cu palabra special di danki na su amigo dr. Jonkhoff, el a gradici e participantenan pa nan dedicacion, nan logronan, nan trabou duro, nan profesionalismo y pa e parti di nan bida cu nan ta dedica den yuda otro, den busca cura pa cancer of den mehora bida di esnan cu ta sufri di e malesa

Eman a bisa cu salud publico na Aruba y otro parti di mundo ta confronta retonan grandi, mirando e desaroyonan cu tin. E ta sigur cu profesionalnan na Aruba, dr. HOH, AZV y otronan ta sinti nan mes reinforsa cu e simposio aki. “Mi lo no papia riba e vision di salud publico na Aruba. Esey mi ta kere ta miho na su lugar pa wordo haci  door di mi colega dr. Schwengle.” Mas leu den su discurso cu un bes mas a capta atencion completo di tur presente pa su bunita expresion di palabra Eman a bisa cu hopi bes e tin diferencia di opinion cu su coleganan den Reino, pasobra e no ta wak cifra, pero e hende tras di e cifra cu ta importante pa tin derecho riba bon cuido medico y bienestar. “Prosperidad ta transcende loke nos tin na entrada. Nos mester tin bon bista pa yuda esnan cu mester di nos sosten y nos solidaridad.”

Dirigiendo su mes na e publico Prome Minister Eman a bisa cu nan tin un profesion bunita pero tambe pisa. “Boso ta wak den wowo di e pashent cu ta duda y ta preocupa si e ta biba pa keda un tempo mas largo cu su famia. Boso tin bes tin e capacidad y conocimento profesional pa yuda e pashent biba un poco mas largo y mehora su situacion di bida. Un miho calidad di bida ta loke nos ta comparti. Esaki ta trece nos hunto aki pa haci un compromiso fuerte pa mira con nos por promove pa e ciudadano un miho calidad di bida.” Prome Minister despues a dedica tempo y atencion na dos bon amigo di dje cu a perde nan lucha contra cancer, Dechi Tromp y Wubbo Ockels.

Expresionnan haci den e articulo aki no necesariamente ta refleha opinion di ArenaPoliti.co