Na inauguracion di simposio di Oncologia 

ORANJESTAD- Nunca esnan cu ta envolvi di cualkier forma cu hendenan cu ta sufri di enfermedadnan mortal manera cancer ta custrumbra cu e sufrimento mental y fisico cu e malesa ta trece cu ne. Prome Minister Mike Eman sigur cu no. Durante su discurso na apertura di e simposio di Oncologia diahuebs mainta den Holiday Inn, el a haci mencion di dos amigo di dje cu a perde e bataya contra cancer. Dechi Tromp, un Arubiano humilde, trahado, un homber cu tabata stima naturalesa y banda di pisca tabata planta su cunucu pa cria su famia. Nunca Dechi por a pensa cu e lo haya e malesa cancer y muri di dje. E otro Wubbo Ockels un homber di ciencia, un astronauta, e prome Hulandes cu a bay den espacio, un piloto y matematico y mucho mas. Tampoco Ockels a biba pensa cu cancer lo ta e destino final di su bida. Ambos tabatin un cos den comun. Nan tabata stima naturalesa. Nan kier a cuid’e y proteh’e y sigure pa futuro generacionnan.

“Mi tabata hopi den contacto cu e dokternan cu tabata trata Dechi Tromp. E tabata come saludabel y ni e ni ami por a compronde loke a pasa cu ne. Dechi Tromp a haya e tratamento necesario, aki y den exterior, pero asina mes el a fayece na su cas despues di un lucha largo y pisa contra cancer. E otro ta Wubbo Ockels, un hende cu a confronta hopi reto den su bida y a surpasa nan, te ora cancer a bati na su porta. E prome biaha cu mi a topa Wubbo Ockels el a conta mi di su experiencia den espacio. El a conta mi algo cu nunca mas mi a lubida. El a kere cu e lo tabata hopi impresiona di mira luna, strea y tur loke espacio ta revela na nos, pero loke realmente a impresiona’e tabata con el a wak mundo for di espacio. E tabata asina impresiona pa e bunitesa y vulnerabilidad di mundo,  cu el a haci su mes e promesa pa ora e bin tera bek, el lo dedica su bida na proteha mundo cu tur loke e por. Enberdad el a dedica su bida na haci e mundo mas sigur y mas bunita. Nos a bira amigo door di esaki y door di e vision di sostenibilidad pa futuro di nos pais.”

Wubbo Ockels mescos cu Dechi Tromp no a sobrevivi cancer. Ambos a lucha duro. Cada un na su manera, cu tur medio posibel. “Pesey mi ta spera di curazon cu boso tin un simposio exitoso y mi ta mira boso cu e speransa pa nos sociedad cu cambionan por bin. Boso tin e conocimento y capacidad pa den futuro yuda hendenan manera Dechi Tromp y Wubbo Ockels gana e bataya contra cancer. Esey ta e deseo di mas grandi cu mi tin.”

Expresionnan haci den e articulo aki no necesariamente ta refleha opinion di ArenaPoliti.co