Despues cu pueblo a lesa locual e lider di fraccion di AVP, Rene Herde a declara siman esta cu “AVP no ta kere cu baha gasto di gobierno lo yuda finanzas di pais Aruba”, tur hende por comprende awor di con nos pais ta unda cu e ta awor. E declaracion aki riba su mes no ta algo di casualidad, pero ta parti di e mentalidad di abusa di placa di pueblo cu ta reina den henter partido AVP. Asina nos por a lesa algun siman pasa tambe un declaracion di sra. Lorna Varlack cu a bisa cu “Mas debe cu Aruba tin, e ta mihor pa e pais su desaroyo”. Y pa no lubida e declaracion di e campeon mes den malgasta placa di pueblo, esta Minister President Mike Eman cu tambe a bisa cu “lo financia tur e compromisonan di gobierno door di bay djis un tiki mas den cora (rood)”.

Record mundial di deficit
Cu Gabinete Mike Eman den apenas 6 aña a hiba nos pais na un desaster financiero, economico y social, esaki ta un hecho cu ta ser confirma pa tur instancia local y internacional, manera IMF, Fitch, Standard & Poor’s, Controlaria General, Conseho Consultativo, CAFT etc. Sinembargo te cu awor e unico politico cu te ainda no kier mira con su ministronan a desgracia e pais aki financieramente ta e lider di fraccion di AVP, Rene Herde. Den un reaccion recien su persona ta confirma cu – debi cu e no ta kere den bahamento di gastonan di gobierno - e deficit financiero di pais Aruba a yega na un record mundial di 9.3% di GDP na 2014. Pa Rene Herde esaki no ta algo dje grave ey ya cu segun su persona e aña aki su gobierno tin e intencion di reduci e deficit te na 3.7%. Sinembargo Rene Herde no ta splica pueblo cu segun e rapport di CAFT di September ultimo tin tur indicacion cu gobierno lo no yega e 3.7% aki na 2015 y asina mes cu su gobierno durante e ultimo aña ya a tuma medidanan drastico cu a corta te den weso di henter e pueblo Arubano. Scenario catastrofal y tristo
Alavez Rene Herde ta lubida di splica pueblo cu nos debe nacional – danki na e mal maneho di su gobierno - lo sigui aumenta den e proximo 4 añanan, esta 4013 miyon florin na 2015, 4165 miyon na 2016, 4231 miyon na 2017 y 4252 miyon na 2018 y esaki sin conta e gastonan di PPP.  Mescos ta e caso di interes riba e debenan cu tin cu wordo paga y lo yega te 202 miyon florin na 2015. Pues esaki ta henter e scenario catastrofal y tristo di debenan (82% di GDP) crea pa Gabinete Eman y cu segun CAFT lo bay dura te cu aña 2034 pa yega na e mesun nivel di debe cu Gabinete Oduber a laga atras na 2009. Pa loke ta e supuesto inversionannan cu Gabinete Eman a haci durante e ultimo añanan, ta un berguensa pa constata con CAFT a declara den su rapport cu “e inversionnan for di e presupuesto di gobierno durante henter e periodo a keda hopi abao y ta resulta den menos cu 1% di e gastonan total den 2014”. Awor lo ta interesante pa haya sa for di Rene Herde ta na kico y na unda tur e resto di fondonan di inversion (99%) a bay, despues cu su gobierno apenas a inverti menos cu 1% di e gastonan total. Medida y mas medida
Alavez ta bon pa recorda Rene Herde con su gobierno di AVP a masacra tur trahador y famia na Aruba door di aumenta e primanan di AOV y AZV cu 1%, aumenta e BBO (BAZV) te cu 3.5%, aumenta e prijs di coriente cu 15%, introduci vastrecht pa coriente di Af. 12,50, aumenta e prima di AOV cu un otro 1%, cobra 27 florin pa recoge sushi, 720 florin pa aña pa parkeermeter, aumenta e edad di pensioen te 65 aña, masacra e empleadonan publico cu Franchise, Middelloonregeling y reduci e Duurtetoeslag, corta den subsidio di tur e fundacionnan social etc. Tur e medidanan aki tin e clase trahador strangula y na rand di desesperacion, ya cu nan no por sobrevivi mas na man di e gobierno aki y e unico persona cu no ta mira esaki ta Rene Herde.
Por ultimo, partido MEP ta presenta un tabel den cual por mira un comparacion di e deficitnan durante Gabinete Oduber (2005-2009) y e deficitnan durante Gabinete Eman (2010-2014). Aki nos ta mira claramente cu e gobierno di AVP a crea 4 biaha mas deficit compara cu e gobierno di MEP, esta 347 miyon versus 86 miyon. Anto ainda Baba no tin berguensa di sigui papia riba finanzas publico di Aruba cu su partido a malogra y desgracia?

Expresionnan haci den e articulo aki no necesariamente ta refleha opinion di ArenaPoliti.co