Con por ta posibel cu un partido cu a gana eleccion na 2009 por a caba cu nos finanzas publico den apenas 6 aña di tempo? Esaki ta e pregunta cu tur hende cu sano huicio ta puntra nan mes ora cu nan constata den ki estado financiero nos pais ta aden na e momento aki na man di partido AVP. Pa hustifica nan maldad den gobernacion di e ultimo 6 añanan, e politiconan di AVP constantemente ta referi na e periodo di 8 aña di gobierno di MEP haciendo como sifuera cu ta un desaster nan a hereda for di MEP na final di 2009. Sinembargo cifranan y datonan estadistico no ta gaña y aki MEP kier a trece padilanti un grafico cu a ser emiti door di ex-Minister di Finanzas Nilo Swaen na momento cu el a traspasa e mando financiero na Gabinete Mike Eman.

Midi nan, midi nos
Locual a resalta den e grafico aki ta lo siguiente:

1. Si na 2001 (AVP) e extra deficit financiero tabata 134 miyon florin, na 2009 (MEP) esaki tabata 97.5 miyon florin. Pero si incorpora den 2009 e entradanan di BBO riba export di Valero di 278 miyon florin cu a ser cobra na juni 2010, anto siguramente na 2009 nos pais lo a conta cu un surplus di 180 miyon florin, contante y sonante!
2. Si na 2001 e claims/debenan di gobierno tabata 607 miyon florin (Garantianan di SACE, Race Track, Radar, Winston & Strawn, Radisson, Fondo Desaroyo San Nicolas), na 2009 e debenan aki tabata solamente 133 miyon florin.
3. Si na 2001 e retraso den pago na APFA tabata 277 miyon florin, na 2009 esaki a ser elimina completamente te na 0 florin.
4. Si na 2001 e fondonan di inversion tabata 0 florin, na 2009 esaki tabata 468 miyon florin. Y awe un biaha mas CFT ta bisa cu e gobierno di AVP na 2014 a inverti menos di 1% di e gastonan total!
5. Si na 2001 e reservanan di divisa tabata 700 miyon florin, esaki a mas cu redobla na 2009 y a yega te na 1500 miyon florin.

Aki por mira claramente cu durante 2001-2009 Gabinete Oduber y MEP a hiba un maneho serio y responsabel y asina mes cu durante henter e trayectoria di 8 aña gobierno di MEP a ser confronta cu periodonan dificil, manera e crisis di 9/11, e guera na Irak, Sars, Nathalee Holloway, e aumento drastico di prijs di crudo te cu 150 dollar pa bari y finalmente na 2008/2009 e crisis financiero internacional cu a afecta Aruba tambe seriamente. Pero door cu nos tabatin gobernantenan capacita, sincero, honesto y cu no ta malgasta fondonan publico, nos pais por a soporta tur e crisisnan aki satisfactoriamente. E cifranan menciona ta papia pa nan mes.

MEP ta construi, AVP ta destrui
Hecho ta cu si na final di 2009 gobierno di AVP a hereda for di Gabinete Oduber 250 miyon florin di placa di Plant N.V., 278 miyon florin di Valero, 190 miyon florin di Fondo Desaroyo Arubano (FDA), 180 miyon florin di 3% di BBO, mas cu 10 miyon florin di ganashi di Banco Central y mas cu 40 miyon florin cash (pues un total di 950 miyon florin!), con por ta posibel cu awe nos t’asina mal para cu Hulanda mester a interveni den nos asuntonan financiero?
Fuera di e suma di 950 miyon florin, Gabinete Oduber tabata tin cla aproba y pa ser ehecuta lo siguiente: 1. E unico hotel di 5 strea Ritz Carlton (200 miyon florin), 2. HAVO/VWO school na Noord (26 miyon florin), 3. Renobacion y expansion di Corte di Husticia, 4. Cas pa anciano y casnan social na Palisiaweg, 5. E hospital nobo na San Nicolas, 6. Renobacion y ampliacion di Maria College, Rosario College y otro schoolnan, 7. E parkenan deportivo na Santa Cruz, Pos Chiquito y Yara, 8. E area comercial di Arubus na San Nicolas, 9. Mudamento di haf industrial pa Barcadera, proyecto di  Jachthaven, embeyecimento di centro di ciudad y un hotel na lugar di Bushiri cu tabata Grand Melia y cu den total lo tabata mas cu 600 miyon dollar na inversion.
Pues mirando tur e pruebanan aki un y tur mes por conclui cu Gabinete Eman a hereda un pais prospero y solido na 2009, pero cu den apenas 6 aña e pais aki a ser ruina y destrui. Y ta pesey mes mester keda inculca den mente di pueblo e lema: MEP ta construi pa despues AVP destrui!

Expresionnan haci den e articulo aki no necesariamente ta refleha opinion di ArenaPoliti.co