Gantry Crane nobo di Waf di Barcadera a yega su punto di mas halto

ORANJESTAD – Waf nobo di Barcadera ta den e fase final di construccion. For di algun luna caba ta trahando riba e ‘Grantry Crane’ nobo cu ta proyecta pa ta totalmente funcional entrante december proximo. Algo cu a hala hopi atencion e ultimo dianan aki, ta grandura di e Crane y cu por tuma nota di dje for di basta leu. Expertonan ta tranando riba e crane nobo aki pa algun luna caba y diahuebs ultimo tabata asina leu cu a hisa e structura na e nivel rekeri (cu un haltura maximo di mas di 70 meter). Minister di Economia, Communicacion y Medio Ambiente, ing. Mike de Meza, tabata na e sitio pa informa su mes di e ultimo desaroyonan.

Minister de Meza a expresa su satisfacion pa con e proyecto aki ta desaroyando. “Nos ta mas cerca di final di e proyecto aki y ta spera cu e ta finalisa januari pa februari di otro aña pa asina por tin mudamento di e containerhaven existente pa e containerhaven nobo.”

E crane aki ta uno completamente nobo cu ta tuma trabou over for di e crane bieu, na waf di Oranjestad, cu ta sali for di servicio na momento cu e mudamento keda finalisa principio di otro aña. N’e waf Nobo di Barcadera, una bes cu e ta full den servicio, ta bay conta cu 2 crane; e Gantry Crane y tambe un crane mobil cu a wordo cumpra 2 aña pasa pa A.P.A. N.V. “Nos ta hopi contento di mira cu tur cos ta canando segun plan y ta sigui dirigi pa nos ta asina leu januari, februari otro aña cu nos por mira e waf nobo di container na Barcadera den operacion.”

Segun ing. de Meza, e Gantry Crane nobo ta sumamente eficiene cu energia y ta haci uzo di programanan sofistica pa su operacion. “E ta full un operacion nobo, caminda cu e operadornan di e crane aki ta haya training specialisa di diferente programa, tecnolgianan nobo cu ta wordo uza, pero tambe debi na e grandura di e crane.” E crante aki, segun de Meza su palabranan, “ta parti di historia pa sigur e siguiente 50 añanan nos dilanti.”

E Mininster encarga cu asuntonan economico di pais Aruba, a splica cu Barcadera ta un parti integral di varios proyecto di Gabinete Mike Eman cu ta tumando luga na e mesun tempo. El a menciona entre otro Green Corridor, Ringweg 3, miho conoci como ‘Watty Vos Boulevard’, cu ta conecta cu waf di Barcadera. “Ta manera pidanan di un puzzel cu ta bay den otro.” Ing. de Meza ta referi aki ta na e rol integral cu e proyectonan di ‘Green Corridor’ y ‘Watty Vos Boulevard’ tin den e vision total pa un waf di container nobo pa Aruba. E proyectonan aki, segun ing. de Meza, ta importante pa e Aruba Nobo pa un economia nobo den tur su facetanan.

Aunke cu e meta primario di tanto ‘Green Corridor’ como ‘Watty Vos Boulevard’ ta pa baha e presion di trafico riba camindanan existente, “pero tambe e ta haci e trabou logistico mucho mas eficiente y efectivo.” Aruba ta creciendo y tur e proyectonan aki ta bay man den man. Un otro proyecto cu sr. de Meza a pasa riba dje ta esun expacion y renobacion di Hospital, cu tambe ta parti importante den henter e vision di e Aruba nobo cu e ta referi na dje.

Expresionnan haci den e articulo aki no necesariamente ta refleha opinion di ArenaPoliti.co