Awe 19 di oktober ta un dia memorabel ya cu riba un dia manera awe 26 aña pasa nos ex-Promer Minister sr. Nelson Oduber den nomber di gobierno a firma un contrato hunto cu sr. Oscar Wyatt di Coastal Corporation p’asina haci posibel e reapertura di e refineria na San Nicolas y cu un inversion di mas cu 250 miyon dollar. Y esaki a sosode den apenas 8 luna despues cu e gobierno di MEP/PPA/ADN a sinta na februari 1989. Remarcabel ta cu e tempo ey sr. Nelson Oduber no a viaha rond mundo, manera Venezuela, Colombia, Mexico, Brazil, Merca, China y pa wak si nan ta interesa den opera e refineria. Solamente un ‘letter of intent’ a ser firma cu Coastal dia 23 di juni 1989 y finalmente e firmamento di e contrato cu duracion di 20 aña riba dia 19 di oktober 1989. E tempo ey den reunion di Parlamento sr. Henny Eman a declara cu si sr. Nelson Oduber logra habri e refineria, e ta un heroë. Esaki a bira realidad ora cu sr. Oduber a logra habri e refineria dia 20 di april 1991 y esaki a keda den operacion durante 21 aña, te cu esaki a cera na November 2012, esta bao di Gabinete Mike Eman.

Hecho ta cu Coastal no solamente a tuma e refineria, pero a bay over na inverti sumanan grandi pa expande e refineria, entre otro cu Delay Coker. MEP di e forma aki a cumpli cu e deseo di pueblo y e promesa di Betico Croes, esta cu si tin 1% di posibilidad pa habri e refineria, cu mester explora esaki profundamente.

Ta pesey laga e dia di awe ta un dia di reflexion, caminda tur intento lo keda ser haci pa habri e refineria atrobe y cu esaki siguramente lo ta na beneficio di Aruba en general y e pueblo di San Nicolas en particular.

Expresionnan haci den e articulo aki no necesariamente ta refleha opinion di ArenaPoliti.co