Minister Otmar Oduber na EPI Hospitalidad y Turismo  

Minister Otmar Oduber diabierna anochi na EPI Hospitalidad y Turismo despues di a haya e recorido pa wak e diferente adkisicionnan cu nan a haya caba danki na e sosten di 500 mil Florin haya for di ATA, a comenta con a yega na e decision di realiza e donacion aki.
El a bisa cu hopi biaha ta inverti hopi den recursonan di mercadeo den nos industria turistico pa percura pa turistanan bin Aruba, pero e pensamento y ideanan na ATA a cuminsa focus riba con ta sigura cu na Aruba mes tambe ta duna e mihor servicio na esnan cu ta bin di afor y pa nos hobennan por brinda e calidad desea di servicio na nos bishitantenan. Di biaha e pensamento a nace pa bay na e raiz di loke Minister Oduber ta bisa ta e exito di Aruba cu ta e capital humano, nos hendenan. “Nos hobennan cu ta lanta awe ta esnan cu mañan tin cu carga e industria asina importante manera industria di turismo. Mi mes a haya e oportunidad y awe mi ta para caminda cu mi ta y hopi di esnan cu a dedica na nos e tempo ey ainda tey dedicando na e nos hobennan”.
El a probecha e ocasion pa recorda Sr. Tony Green cu a fayece siman pasa y cu tempo cu Minister Oduber a bay Bushiri (e tempo ey) tabata director y a dedica masha hopi di su bida na e industria di turismo y e hunto cu tur otro cu ta dedica nan mes na traspasa nan conocemento na nos hobennan ta e inspiracion pa sostene y inverti den e ramo di enseñansa dedica na nos turismo.
E mandatario di Turismo a gradici tur esnan di ATA cu tabata envolvi y primordialmente e Hunta di Supervision di ATA cu dia 7 di augustus a bishita e scol hunto cu Minister Oduber y Minister Hooyboer-Winklaar. “Ma hunga echt un triki cu nan pa trecenan pasobra una bes nan wak kico ta pasa akinan y nan realiza e importancia, mi lo a garanan y nan lo a haci esaki posibel pa EPI y pa nos futuro generacionnan”, Minister Otmar Oduber a duna di conoce.
Tambe e mandatario a bisa cu esaki no lo por tabata posibel tampoco sin su colega Michelle Hooyboer-Winklaar cu hopi biaha ta bataya den Conseho di Minister cu su curazon pa enseñansa y ta mustra riba e importancia di inverti den entre otro EPI. Minister Oduber a gradici su colega pa permiti yudele y duna un man den e proceso aki.
Finalizando Minister Oduber a gradici Irayka Yanez cu a contribui cu henter e proceso aki pa pone e prome steenchi di hopi steenchi mas cu lo pone pa construi e EPI nobo pa nos hobennan.

Expresionnan haci den e articulo aki no necesariamente ta refleha opinion di ArenaPoliti.co