Minister Otmar Oduber hunto cu ATA: a anuncia inversion di mey miyon Florin den EPI sector Horeca
Diabierna mainta Minister Otmar Oduber hunto cu su colega Michelle Hooyboer-Winklaar, Jim Hepple, Ronella Tjin Asjoe- Croes y Harry Koeman tabata presente na colegio EPI sector horeca unda nan a haya un recorido di e campus for di un di su directornan Ryan Maduro.
Duante e mainta aki a haya un splicacion di e contribucion di EPI pa sector di turismo y tambe e necesidadnan di e scol. Despues di a haya e informacion aki, Minister Oduber a reuni cu e partnernan den turismo presente na EPI mes y asina a anuncia na esnan di EPI un inversion di mey miyon Florin na e sector horeca di e scol pa asina e studiantenan por conta cu e ekiponan cu nan tin mester.
Minister Otmar Oduber a remarca cu entre e partnernan den sector di turismo, tanto priva como publico tabatin diferente conversacion con lo por contribui cu EPI sector di hospitalidad mirando cu for di aña pasa Oficina di Turismo a expande nan responsabilidadnan, no solamente ta atrae turista pa bin Aruba, pero awor ta traha tambe pa sigura cu e experiencia di e turista na Aruba ta uno cu ta surpasa e expectativanan cu nan tabatin y asina traspasa esaki pa nan famia y amigonan ora nan bay bek.
Den e cuadro ey Minister Oduber diahuebs a yama EPI sector hospitalidad pa haya un recorido na e scol y nan a haci esaki di biaha, pa cual e mandatario ta hopi agradecido cu henter directiva di e scol a hacie durante nan vakantie.
E mandatario ta bisa cu a pesar cu nan tabata sinti caba cu mester duna mas aporte na educacion y formacion di esnan cu mañan tin cu traha den e area di hospitalidad, diabierna den apenas un rato a conversa y a dicidi cu dentro di e presupuesto di ATA pa e aña aki, cual ta uno cu a surpasa e expectativanan, ta haci e inversion di mey miyon den EPI. E inversion aki lo bay pa cubri e lista completo cu nan a ricibi for di directiva di EPI durante e bishita y cu ta encera entre otro infrastructura, computer, pa maestronan, pa e hobennan, pa cushina y material necesario.
Expresionnan haci den e articulo aki no necesariamente ta refleha opinion di ArenaPoliti.co