Impacto di mercado Venezolano tabata e topico principal  

Diaranson Minister Otmar Oduber a reuni cu e Hunta di AHATA pa trata diferente tema di interes pa loke ta industria turistico, situacion actual, resultadonan y expectativanan pa otro aña.
E tabata un reunion hopi positivo unda e diferente actornan a bin cu sugerencianan dilanti cu ta di interes pa tene na consideracion.
Minister Oduber a indica cu e reunion tabata uno hopi ameno, habri y importante mirando cu e topico principal tabata e impacto di e mercado Venezolano. Di otro banda a reconoce cu e mercado Mericano pa hopi di e resortnan tabata sumamente positivo cu un crecemento di 8 pa 9%, mientras cu 4 pa 5 hotel a confia hopi riba e mercado Venezolano y no a haya oportunidad di realoca nan mes den e mercado ora e buelta dal na Venezuela y nos a cuminsa sinti e efecto di esaki. A conversa largo riba e tema aki y tambe riba posibilidadnan cu tin pa futuro di con por mehore.
E mandatario ta conciente cu ora cu tin 4 pa 5 resort di e tamaño di un Tropicana, The Mill, Renaissance y Brickell Bay cu a ‘bank’hopi riba e mercado Venezolano ta pone cu ta haya un cambio grandi den cifra di ADR (prijs di camber), RevPar (entrada pa camber disponibel) y grado di ocupacion. El a bisa tambe cu tur partner presente a indica cu nan ta conciente cu esaki tin di haber cu e mercado Venezolano.
A papia tambe riba mercadonan nobo manera esun di Mexico cu lo bay habri na 2016 y tambe riba con lo bay diversifica dentro di Merca mes cu ta encera cambionan di strategia cu ta wordo haci cada biaha.
Na 2009 ora Minister Oduber a asumi e responsabilidad ministerial y tabatin e problematica na Merca, a tuma e decision di bay diversifica, drenta Latinoamerica y awe kier draai bek pasobra e mercado Mericano ta bon bek, presencia di Aruba ta bon, inversionnan a wordo haci y economia ta bon. Esaki no ta kita cu mester tene na cuenta cu e situacion na Merca por cambia repentinamente y gobernacion no ta mescos cu hotel cu por cambia di direccion di un dia pa otro, den gobernacion mester planea riba termino largo y a base di strategianan cu ta bon pa tur hende y no solamente pa algun resort.
Minister Oduber a comenta cu pa loke ta algun strategia pa 2016 a palabra cu hunto cu ATA lo wak con lo bay pusha luna di januari cu na e momentonan aki hotelnan cu a depende hopi riba mercado Venezolano ta sintiendo un efecto di esaki, pero tambe lo sigui enfoca riba e otro lunanan cu ta premira cu lo ta uno sumamente positivo pa nos turismo.
“E conversacionnan tabata hopi habri awe, tin hopi sugerencia cu a bin dilanti y definitivamente un di e conclusionnan ta cu mester tin hopi mas comunicacion, papia mas habri cu otro. Tur cu tur un reunion sumamente positivo unda a toca topiconan cu semper un biaha pa aña nos ta toca y awor nos a palabra cu lo topa mas frecuente, 2 pa 3 biaha pa aña y conversa riba e diferente puntonan”.

Expresionnan haci den e articulo aki no necesariamente ta refleha opinion di ArenaPoliti.co