Pa ningun hende e ta un secreto mas cu esnan cu ta pasando den un situacion financiero precario, ta haya un stempel di sinberguensa serca esnan cu ta forma parti activo di partido AVP. 

Un ehempel specifico di loke mi ta referi na dje ta ora cu nos mira expresionnan denigrante pa cu hende di menos recurso, cu ta sali directamente for di casa di un Minister, for di Parlamentario, y candidatonan di AVP. Expresionnan manera “famia super bruha”, “adicto na alcohol y droga”, “sinberguensa”, ta e argumentonan cu integrantenan di partido AVP ta uza pa atacha esnan cu ta pasando den necesidad, y asina defende e mal maneho di nan Gobierno.

 

Mirando e comportacion di superioridad cu ta reina den e politiconan di AVP, e no ta un sorpresa cu nan a cuminsa mustra publicamente nan berdadero cara. Pero loke cu si ta keda sorprendente ta e hipocresia cu nan ta emplea durante campaña pa busca voto serca e hendenan di mas humilde cu tin riba nos isla. Ta parse cu ora di campaña so esnan di menos recurso ta haya respet y aprecio for di partido AVP.

Uzando tur tipo di manipulacion y mentira, partido AVP a sa di uza e situacion precario cu hopi hende ta pasando aden pa asina logra cumpli cu nan metanan propio di poder. 

 

Siguiendo e principionan politico social-democrata, MEP ta un partido cu ta mantene un gran respet pa e ser humano en general.

Nos partido a lanta cu un ideologia caminda no tin lugar pa segregacion y mucho menos discriminacion. Y ta precisamento cu e balornan aki, nos ta hiba nos politica. Pa nos e ser humano ta central y mester keda central, sin importa ki rasa, religion, of clase social e tin.

Ta pa e motibo aki, pa nos e ta sumamente indignante di mira e manera baho cu integrantenan di partido AVP ta uza pa menosprecia esnan cu no ta biba den rikesa.

 

Como parti di nos politica den MEP, nos ta bishita cas di famia regularmente pa scucha nan dolornan, y yuda te unda cu nos por.

Pero como cu nos ta mantene un respet grandi pa e dolornan di esnan den necesidad, nos no ta hasi publicidad cu esaki. Nos prioridad ta di purba duna un man na esnan den necesidad, y no hasi politica cu dolor di hende manera ta e custumber di esnan liga na AVP.

 

Na Aruba nos a yega na un punto cu show y palabranan bunita no ta valido mas. Awor nos a yega na un punto cu nos mester solucion inmediato pa tur e problemanan social cu a cuminsa destrui nos esencia arubano di pas y trankilidad.