MEP: MEP ta recorda e prome aña di fayecimento di su co-fundador Efrain de Kort
Awe 31 di december nos ta recorda e prome aña di fayecimento di un gran baluarte y ex-politico Arubano, Efrain de Kort, kende tabata co-fundador di nos partido na 1971 y te cu eleccion di 1983 a aparece riba lista.
Den trayectoria di su bida Efrain a ocupa diferente funcion den nos comunidad, entre otro Ministro di Finanzas di Antiyas, Diputado di Finanzas di Aruba, Miembro di Parlamento di Antiyas, Miembro di Eilandsraad di Aruba, Hefe di AVD, Presidente Comisario di Centrale Bank Aruba, Presidente Comisario di Compania di Utilidad y Fundador di Banco di Desaroyo di Aruba.
Como Minister di Finanzas di Antiyas Efrain de Kort tabata e prome persona cu tabata tin e curashi pa aumenta e impuesto di ganashi riba Lago y Shell di tal manera cu Gobierno Insular di Aruba tabata ricibi 28 miyon florin mas cu antes pa aña. Cu e placa aki Gobierno Insular por a financia tur e proyectonan na beneficio di comunidad. Como diputado Efrain tabata encarga cu asuntonan financiero, desaroyo economico, TAV y cuido social. Schouder cu schouder y cu un lealtad incondicional el a lucha hunto cu Betico Croes den e logro di nos Status Aparte. Sin duda cu su contribucion na e logro aki tabata inmensamente grandi. Efrain su espirito di lucha, dedicacion y fieldad na nos partido lo keda semper graba den nos curason.
Expresionnan haci den e articulo aki no necesariamente ta refleha opinion di ArenaPoliti.co