ORANJESTAD – E siman aki atrobe e programa Sociale Vormings Traject di Ministerio di Asuntonan General bou encargo di Premier Mike Eman a certifica un grupo di hoben cu ta reintegra den comunidad cu un perspectiva y proposito nobo y positivo pa bida. E logro aki ta e fruto di esfuerzo y boluntad conhunto di diferente persona y instancia cu ta comparti e vision di Minister President Mike Eman pa ofrece hobennan un di dos oportunidad pa ta un bon ciudadano.

E dicho na Ingles ta bisa: “It takes a village to raise a child,” y den caso di Formacion Social, e mesun principio ta aplica caminda ta tuma un ekipo di diferente persona pa brinda e hobennan e hermentnan di educacion y sosten moral cu nan tin mester. Ademas di Jessy Ras  y personal di oficina di SVT, mester menciona e cooperacion valioso di VNO, MariniersKazerne, Arumil y Enseñansa pa Empleo, entre otro.

Manera a yega di splica caba den ocasionnan anterior, Formacion Social ta un trayecto di 12 luna cu ta consisti, na prome luga, di un cuater luna di entrenamento fisico estilo militar, trabou den ekipo y disciplina cu ta tuma luga na base di Mariniers na Savaneta.

E di dos fase ta enfoca riba estudio caminda e hobennan, pa medio di Enseñansa pa Empleo y otro instructornan adicional, ta haya oportunidad di siña diferente habilidad y idioma manera Ingles, Hulandes, Computer y Matematica.

Entre e instructornan cu SVT ta conta cune por menciona Roland Becker, John Maduro, Belquis Moreau, Pastor Orman, Lilly Velasquez, Franklin Leslie, Lenny Denz y Daniel Aguirre. Tur ta persona comprometi cu e proposito di Formacion Social y ta semper na disposicion pa atende e preocupacion di e hobennan.

E di tres y ultimo fase den e trayecto ta esun di core stage na un compania of instancia local. Grupo 7, por ehempel, tabatin oportunidad di demostra tur loke na a siña na luganan manera hotelnan Divi Phoenix, Costa Linda, Playa Linda y companianan Mexim Security y Affinity Lighting & Design. Tambe algun cursista a traha na departamentonan di cushina y garashi di Marinierskazerne y na Parke Nacional Arikok.

Formacion Social ta andando desde 2012 ora cu Prome Minister Mike Eman a bin cu e iniciativa. Danki na e aporte di Sr. Piet Pronk, d.f.m. e inciativa a haya apoyo di Ministerio di Defensa di Hulanda cu a wak inmediatamente e potencial di e idea. Varios di e graduadonan ta haya trabou di biaha na e luganan caminda nan ta core stage y tambe tin cu ta opta pa sigui cu un entrenamento y carera profesional den Arumil.

Pa mas informacion riba Formacion Social y tambe inicio di e siguiente grupo na februari proximo, bishita nan pagina di Facebook, yama oficina di SVT na 522-5353 of 592-6160 of manda un email na This email address is being protected from spambots. You need JavaScript enabled to view it..

Expresionnan haci den e articulo aki no necesariamente ta refleha opinion di ArenaPoliti.co