“Si nos mester cai na caminda hamas boso laga e causa un banda, pero gara e bandera Arubano y sigi lucha pa realisa y preserva e libertad di nos pueblo” Dia 25 di januari nos ta celebra e fecha natalicio di Gilberto Francois “Betico Croes”. Betico a nace na Santa Cruz riba 25 di januari 1938.

Despues di su estudio secundario na Aruba, ela bai Hulanda pa continua cu su estudio na Academia Pedagogico na Hilversum. Na 1959 ela logra su “hoofdakte” como docente. Ora ela bolbe Aruba ela bai duna les na Colegio San Hose y Colegio San Antonio na Santa Cruz.

Na 1967 su carera político a cuminsa, prome como miembro di partido AVP. Ora Betico a wordo nenga e posibilidad pa bira líder di partido AVP, ela separa di AVP y na aña 1971 ela funda partido Movimento Electoral di Pueblo (MEP). Desde fundación di e partido te na su fayecimento, Betico tawata líder y presidente di e partido. E mes nunca a ocupa posición di diputado of minister, pero como “Consehero General” Betico semper tawata tin un influencia grandi riba e coalicionnan cu MEP a forma parti di dje.

LUCHA PA STATUS APARTE
E lucha di nos pueblo pa e por para riba su mesun pianan, ta un deseo di hopi aña atrás, y cu a wordo guia pa diferente lidernan politico.Betico Croes a distingui su mes pa e derecho di autodeterminación di e pueblo Arubiano. Pa logra esaki, Betico a busca simbolonan cu a uni nos pueblo y asina na 1976 Aruba a conoce su propio bandera y himno, danki na insistencia di Betico Croes. Betico y MEP tawata lucha pa un status aparte pa Aruba dentro di Reino Hulandes, los di Antiyas Hulandes. Riba 25 di maart 1977 ela organisa un referendum, cu a condusi na nos Status Aparte.

AUGUSTUS SCUR
Na 1977, ora gobierno central kier a tene MEP (e partido mas grandi) for di gobierno, Betico Croes a lanta e pueblo di Aruba pa manifesta contra e poder di Curacao. E situacion a escala y Curacao a manda ‘riot commando’ riba e manifestantenan. Algun manifestante a keda herida cu bala di carabina. Gobierno Hulandes na e momento ey a realisa cu e mester tuma e exigencianan di Aruba na serio y e gobierno Hulandes a invita un delegación di Aruba pa bai Den Haag pa delibera. Eynan Betico Croes a bringa pa Status Aparte.

RONDE TAFEL CONFERENTIE
Betico Croes a guia e delegacion Arubiano durante e “Ronde Tafel Conferentie” decisivo na februari 1981 y maart 1983, caminda ela logra e Status Aparte entrante 1 di januari 1986. Un condicion di parti di Hulanda tawata cu Aruba lo ta independiente entrante 1 di januari 1996. Betico Croes no tawata kier e independencia na e momento ey, pero toch a bai di acuerdo, cu e speranza cu e lo por a pospone of elimina e independencia. Berdad na aña 1990, bow liderazgo di Nel Oduber, e condicion di independencia entrante 1 di januari 1996 a wordo elimina.

Den su discursonan elocuente Betico Croes a enfatisa cu e no tin miedo di ta un mártir pa e causa sagrado di Aruba. Betico te asta a wordo encarcela, despues cu nan a haya un arma den su auto, algo cu segun esnan cerca di dje tawata un complot contra dje.

DESTINO INCOMPRENDIBLE
Durante un parada durante elección na 1983, ela wordo herida pa bala door di un polis. El’a wordo herida gravemente y mester a wordo transporta cu urgencia pa Merca, caminda el’a keda pa 5 luna.

Riba 31 di december 1985, apenas algun ora prome cu Aruba lo a drenta su Status Aparte, Betico Croes a keda seriamente herida den un accidente di auto, cu te awe a keda un misterio. Casi 11 luna después, riba 26 november 1986, ela fayese.

Despues cu gobierno di AVP a tuma mando na 2009, por a nota un tendencia lamentable di parti di e partido na mando pa trese duda riba e logronan di Betico. Tin cu a bai asina leew di atribui e logro di Status Aparte na Mito Croes, algo cu e gran mayoria di nos pueblo nunca a acepta. E polemica inecesario aki tabata tin su consequencia den nos pueblo. Y dia 17 di april 2011 personanan desconosi y pa motibonan te ainda desconosi a habri e graf di Betico, destruyendo un parti di dia. E acto condenable aki a sa di uni e pueblo di Aruba un biaha mas, manera Betico so tabata sa pa hasie, y nos pueblo a demostra su desaprobacion. Pueblo di Aruba a haya e oportunidad un biaha mas pa demostra e gran cariño, respet y gradisimento cu nos ta sinti pa Betico, dia 23 di april 2011 durante e re entiero. Te e dia di awe lamentablemente autoridadnan no por a pone man riba esnan cu a comete e acto condenable aki.

Betico Croes ta wordo considera e ‘Tata di nos país’, y meresidamente el’a wordo nombra pa nos Parlamento oficialmente como ‘E libertador di Aruba’.

Betico Croes a bisa “Si un dia nan pone nos Status Aparte na peliger, esey kiermeen guera” y “Si nos mester cai na caminda hamas boso laga e causa un banda, pero gara e bandera Arubano y sigi lucha pa realisa y preserva e libertad di nos pueblo”.

Laga nos celebra Dia di Betico manera e tawata kier semper, den union cu otro y pa amor pa nos país.

Expresionnan haci den e articulo aki no necesariamente ta refleha opinion di ArenaPoliti.co