Diabierna atardi a continua e debate den parlamento di Aruba pa di 4 dia consecutivo, unda ministersnan a toca turno pa contesta preguntanan haci door di tur fraccion den e primera tanda. Apesar cu mayoria di e contestanan di tur minister tabata hopi zwak y tin cu no a ni ser contesta, nos mester remarca locual a hala nos atencion ta e manera cu Minister President Mike Eman a comporta y a expresa su mes. No obstante Mike atrobe kier a hunga politica barata ripitiendo tur cos cu ya el a ripiti 6 aña largo, mester bisa cu “PORFIN” Mike Eman a acepta tambe cu E hunto cu AVP ta e unico causante di e disaster financiero creando e MEGA DEBE pa nos pueblo y futuro generacionnan. Mike Eman a grita den parlamento y mi lo cita su palabranan como lo siguiente:”Nos a haci e escogencia cu orguyo sra. Presidente y mi ta para cu orguyo akinan pa bisa cu e DEBE TEY pa nos tur pag’e pa futuro” Analisando profundo Mike Eman su comportacion y discurso durante reunion diabierna ultimo mi ta yega na e conclusion cu Mike Eman ta sufri di un malesa conoci como “ARRIBISMO”. Arribismo ta un acto unda un persona kier intenta di demostra algo cu no ta real.  Arribismo ta ora un  persona cu ta busca aceptacion di e clase mas halto sin importa e medio cu e mester usa pa logra su satisfaccion y felicidad basa riba su propio status y rikeza material. Arribismo y SINBERGUENSA no ta mucho leu di otro. Pues Mike Eman pa logra esaki ta usando henter e pueblo di Aruba den combinacion cu diferente instancia manera entre otro prensa comprometi. “Emanipulacion”. Clase mas halto ta por ehempel Mike su relacion cu entre otro Kiko Gomez y Roberto Rincon. Mike Eman a admiti den su discurso publicamente kisas pa ekibocacion cu su persona y AVP a redobla e debe di pais Aruba y a mustra sentimiento di felicidad ora el a declara cu e ta orguyoso y cu e debe tey pa nos tur bay paga den futuro. Aruba ta den un situacion financiero hopi critico y tin mester di politiconan cu enrealidad ta stima e pueblo y kier traha pa e pueblo pa hunto nos por logra sali di e crisis “EMAN” sin mester sacrifica e pueblo. Mi ta sigur cu pueblo a compronde awor si e manipulacion di Mike y AVP y mi ta carga e confiansa cu pronto lo bin un cambio unda hunto nos lo mester rescata e pida baranca aki. Nos lo no sosega tanten nos no mira e cambio.

Expresionnan haci den e articulo aki no necesariamente ta refleha opinion di ArenaPoliti.co