ORANJESTAD - Durante tratamento di Presupuesto 2016 lider di fraccion di MEP a haya ta bon pa lansa acusacion contra di casanan di Parlementarionan di AVP. Algo ful fout pasobra ningun casa ta den politica. Segun sra. Wever Croes casanan di diferente miembro di fraccion di AVP lo ta cobrando un dineral pa servicionan como abogado. Ta conoci cu sra. Wever Croes ta kere cu un mentira bisa 100 biaha lo bira un berdad. Esey ta un di su conocido modus operandi, y e ta uze regularmente. E biaha aki, y nos lo ta obliga di cada biaha di nobo, mester bolbe cord'e cu un mentira no por evoluciona den un berdad pa e simpel echo cu el a wordo crea den su mente diabolico. Colmo di los colmos ta cu casa di lider di MEP si ta parce di tin tonelada di manteca riba su cabez. Djis corda e caso di 'Eris Crius'. Al buen entendedor!

Ta durante tratamento di Presupuesto ora cu a puntra gobierno tocante e caso cu un bufete di abogado cu lo ta cobrando un restante di un suma astronomico pa servicionan brinda na gobierno di MEP, cu sra. Wever Croes a recori un bes mas na su sistema simpel pa purba tapa e barbaridadnan cu a wordo cometi bou di gobierno di MEP durante 2001 pa 2009. El a lanta falso testimonio. Su mal maya. Investigacion tras di investigacion a mustra e cantidad grandi di placa cu un solo famia a lastra bay cu ne for di caha di Pueblo. Miyones!! Te ainda, den aña 2016, nan kier sigui fiesta y ta bay Corte pa cobra pueblo di Aruba mas cu 600.000 florin cu lo mester paga bufete di famia di lider di MEP ainda pa consehonan y casonan perdi durante gobernacion di MEP. Mind you:  esaki ta un suma cu lo ta habri despues cu ya a desconta impuestonan y otro debenan habri cu e bufete di abogado aki tin cu gobierno. Pa colmo ex-ministernan di MEP a sigura e bufete di abogado aki, cu nan lo wordo paga. No mester ta clarividente pa saca afo ta cua ta e minister cu a duna nan palabra. Drie maal raden!

Berdad cu mi casa tabata consehero di un minister y a wordo paga pa esaki, manera mayoria otro bufete di abogado na Aruba cu tambe ta duna conseho y ta haci casonan pa gobierno. Pero contrario na e bufete di Papa, cu tabata cobra mas cu e suma normal pa bin na remarke pa wordo contrata pa gobierno, bufete di mi casa tabata cobra e honorario normal. Pa mi casa yega na cobra e suma cu Papa a cobra gobierno di Aruba den periodo 2001 pa 2009, e lo mester traha sin descansa ni un ora den su bufete di abogado pa gobierno di Aruba pa mas cu 50 aña sigui. Esey ta pa ilustra cu kier compara un bez mas peer cu appel putri.

Expresionnan haci den e articulo aki no necesariamente ta refleha opinion di ArenaPoliti.co