Fundacion Museo Arubano ta trahando duro riba e proyecto di museonan na San Nicolas. A defini tur locual ta e storia cu lo kier trece padilanti den e museonan.  Pa por haci esaki di e miho forma cu un calidad mundialmente reconoci, a trece dos experto riba loke ta diseño di exposicion di museonan, di e compania mundialmente reconoci OPERA Amsterdam. Minister Otmar Oduber a ricibi un presentacion di tanto FMA como di e expertonan Hulandes pa e por tin un miho bista den ki direccion ta bayendo cu enfoke riba Museo Industrial prome, despues Museo Comunitario ainda pa e aña aki y pa 2017 sigui cu e Museo di Carnaval. E directora di FMA Anky Vrolijk ta comenta cu e motibo cu a busca e conseho di e arkitectonan aki ta cu nos tin un producto di calidad, un producto internacionalmente conoci y lo kier atrae tambe e turismo cultural pa presencia nos historia riba un nivel halto. A logra entusiasma e dos expertonan cu cultura di Aruba na unda por bisa cu e proyectonan ta den e fase inicial. Renwick Heronimo cu ta e curator di Fundacion Museo Arubano ta splica cu e prome museo cual ta e Museo Industrial cual lo ta ubica den e Watertoren na San Nicolas unda lo conta tur e narativa nan di e desaroyo di nos industrianan cual ta oro, fosfaat, aloe, petroleo, turismo y "berde" pero tambe ki impacto cada uno tabata tin pa Aruba. Pa locual ta e Museo Comunitario lo conta mas e desaroyo di e pueblo, nan custumbernan, nan gustonan, estetica y loke ta forma e comunidad di San Nicolas. Tur tres museo lo ta museonan hopi interactivo, unda for di e fase inicial aki caba lo involucra 15 pa 20 artista pa yuda defini di kico e Museo Comunitario ta unda e pueblo mes lo vota pa dicidi kico e exposicion ta bay bira. Intencion ta pa conta e storia cu comunidad central den tur tres museo. FMA den e ultimo siman aki a brinda un tour na e expertonan Hulandes unda Aruba su autencidad palpabel ta un impacto grandi pa henter e ekipo trahando riba e proyecto.  
Minister Oduber a keda sumamente satisfecho cu e presentacion y e esfuersonan cu ta haciendo pa e museonan na San Nicolas. "E meta naturalmente ta pa nos propio hendenan, pa preserva nos historia, preserva loke ta parti di nos y transmiti esaki pa nos futuro generacionnan. Pero parti di dje ta sigur pa por haci di San Nicolas un atraccion pa e turismo cultural. Un plan cu pa e ultimo añanan aki nos a bin ta papia di dje y cu awor ta culminando tambe den e trabounan andando y inversionnan  haci den centro di San Nicolas." Den su ultimo biahe di trabou na Francia Minister Oduber a sinta cu organisacion mundial di museonan pa mira e criterionan pa Aruba tambe bira miembro di e organisacion aki, pa cual Aruba lo por spera nan bishita tambe cu nan expertonan dentro di poco. E mandatario ta splica cu tur esaki ta pa, no simplemente habri algun museo mas pa nos isla, pero e museonan aki na San Nicolas carga e renombre internacional cu sosten di organisacionnan, pa locual ta trata diseño, calidad, infrastructura cu ta bay tin hunto cu ne y mas cu tur e materialnan cu ta bay wordo exponi ta di un nivel halto internacionalmente. Sr. Oduber ta termina bisando: "Intencion ta pa na mita di e aña aki e prome museo lo mester ta cla y na final di e di tres kwartaal tur dos lo mester ta cla pa drenta den funcion y di e forma aki tambe haci e apertura oficial hunto cu nos miembresia di e organisacion internacional cu artistanan di rond mundo aki na Aruba pa e gran evento aki na e prome dos museonan di San Nicolas."

Expresionnan haci den e articulo aki no necesariamente ta refleha opinion di ArenaPoliti.co