Guillfred Besaril (MEP): "No por sostene un Minister cu a mete y perhudica Aruba su Carnaval!"
![160204 besaril 1](/images/2016-Q1/160204-besaril-1.jpg)
Durante e reunion di prespuesto 2016, fraccion di AVP a presenta un mocion relaciona cu cultura y carnaval. E mocion cu a wordo presenta tabata tin como esencia pa duna e Minister di Cultura e sosten necesario den su tarea pa garantisa continuidad di nos carnaval.
Muy apesar cu e mocion tabata uno simpatico y di bon intencion, nos fraccion tabata di opinion cu dicho mocion a keda corto na un elemento masha cardinal mes, esta di instrui (obliga) e Minister na drecha e situacion cu e mes a yuda ocasiona!
Nos fraccion ta di opinion cu politica mester a keda leu di nos carnaval. Un conflicto entre dos organisacion - SAC y SMAC - a yega un extremo cu awe un y tur ta lamenta pa motibo cu e la termina ta costa Aruba su festival di mas grandi di aña, esta Calypso & Roadmarch (Caiso & Soca) contest!
No solamente nos artistanan a sali perhudica di e situacion, ya cu ta trata di nan "Showcase" anual, sino tur hende cu ta stima nos carnaval. Tur a ricibi un golpi formal. P'esey mes nos fraccion tabata enfatico na momento di argumenta nos votacion riba e mocion. E situacion ta asina tristo, cu nos no por a bai pro un mocion cu ta djis "sostene" e Minister. E mester tabata un mocion cu ta OBLIGA e Minister na coregi loke a bai robes!
Loke a sosode e aña aki cu e contest ta un berguensa di marca mayor, por lo tanto Minister di Cultura mester hasi lo corecto na bienestar di Aruba su Carnaval!
Expresionnan haci den e articulo aki no necesariamente ta refleha opinion di ArenaPoliti.co