"Minister di Husticia, sr. Dowers, contrario na loke tur otro partner den Reino ta hasi, a haña ta bon pa sconde e relatonan anual di Ministerio Publico desde 2010. Despues di masha insistencia di parti di nos fraccion, camida hasta mester avisa e Minister cu si no entrega e relatonan aki debidamente, lo acudi na Corte pa asina conforme e ley di Transparencia (LOB), busca un orden di Juez contra e Minister pa e por cumpli cu e peticion di partido MEP.

Durante e tratamento di presupuesto 2016, Minister Dowers porfin a pone e relatonan di 2010 te cu 2015 disponibel pa tur 21 miembro di Parlamento. Pa sorpresa di un y tur, Parlamento a bin topa cu poco relato masha superficial si compara esakinan cu otro resumenan den Reino. Tin algun di e relatonan cu ni sikiera tin un asina yama "Nota di Introducion", cu por lo general ta wordo presenta sea pa e Procurador General, su reemplasante of Hoofd Officier van Justitie. E hecho aki ta causa un impresion masha desalinea pa Aruba su Ministerio Publico.

Den mi segundo disertacion durante tratamento di e presupuesto 2016, mi a elabora entre otro riba e relato anual 2014 di Ministerio Publico di Corsou. E Ministerio Publico na hermana isla Corsou, si ta zorg pa un introducion formal den cada un di nan relatonan anual. Den e introducion nan ta splica Pueblo nan vision, e programanan cu nan tin tanto den "Pipeline" como esnan den pleno ehecusion, ademas ta duna un splicasion di e resultadonan. Nan transparencia ta pone cu e comunidad ta compronde nan maneho, cu e resultado di ta ricibi un bon acohida pa diferente di nan iniciativanan.

Ministerio Publico na Corsou a presenta diferente proyecto. Un di nan cu a yama mi atencion, den cuadro di e convivencia necesario cu Pueblo, ta e proyecto "Mi ta brasa Seguridad". Meta principal di e proyecto aki ta di logra corta e distancianan grandi cu ta existi entre e comunidad, e diferente partners den cadena hudicial y otro grupo di interes manera entre otro Comercio.

Contrario na Corsou, semper Ministerio Publico na Aruba a keda cuestiona pa nan imparcialidad, color politico y mas cu tur cos nan falta di effectividad. E ta un berdadero lastima pa motibo cu nos fraccion no tin duda cu Ministerio Publico na Aruba ta conta cu un grupo di academico cu experiencia. Pero pa motibo di falta di accion of iniciativanan concreto manera e proyecto "Mi ta brasa Seguridad" na Corsou, Aruba su Ministerio Publico mester deal cu un “stigma” cu tin como consecuencia cu Ministerio Publico no tin ni e effecto mucho menos e reconocemento den Pueblo cu nan ta desea.

Na final nos por conclui un solo cos: E relatonan anual di Ministerio Publico di Aruba ta un refleho palbabel cu e prioridadnan di Gabinete di sr. Mike Eman ta robez y cu e Minister di Husticia actual no ta convivi ni cu su departamentonan, corda cu Pueblo! Nunca mester a permiti pa nos Ministerio Publico a yega na extremonan asina desventahoso. Su rol den nos systema huridico penal ta demasiado importante!"

Expresionnan haci den e articulo aki no necesariamente ta refleha opinion di ArenaPoliti.co