Lolita, representando e forza di un comunidad, un escultura di tamaño real 

Diahuebs mainta Minister Otmar Oduber a sinta hunto cu e artista renombra Gilbert Senchi pa papia riba e posibilidadnan pa crea un obra di arte reconociendo un di e wesonan di lomba y persona reconoci na San Nicolas y Aruba henter, Lolita.
Tur hende por corda Lolita, e hende muher balente cu semper a traha duro bendiendo su cocada, pinda y biyechi Corsow...un persona cu ta representa e fortaleza y cultura di nos hende muher y di San Nicolas. A palabra cu lo realiza algun estudio pa mira e factibilidad y e fecha cu e obra di arte aki por bira un realidad.
Gilbert Senchi a indica cu el a reuni cu Minister di Cultura Otmar Oduber riba e proyectonan cultural nobo cu e tin pa San Nicolas y pe ta un honor di por participa cu esakinan mirando cu e ta di San Nicolas tambe. Senchi a bisa cu e proyecto di Lolita ta uno hopi interesante mirando cu ta trata di un personahe hopi simbolico di San Nicolas, persona cu e tabatin e oportunidad di conoce tempo cu e tabata chikito. “Mi ta haya un bon escohencia cu Minister a tuma un personahe asina importante pa San Nicolas y dignifike di tal manera mirando cu e ta significa hopi pa e cultura di San Nicolas”.
Indra Zaandam, consehera di Minister Oduber na su turno a conta cu e reunion tabata uno hopi interesante na unda un proyecto di un persona hopi grandi pa Aruba y specialmente pa San Nicolas a wordo presenta.
Lolita tabata un señora cu caracter fuerte di San Nicolas, hopi independiente, a cria su famia cu su propio recursonan, nunca el a pidi ayudo di Gobierno. Lolita ta representa e señora trahador di San Nicolas. Lolita hopi biaha tabata sinta den vecindario di Joe Laveist pa bende su productonan. Hopi hende a conoce y tin un storia di dje.
E proyecto a wordo presenta di tal forma cu Lolita lo wordo presenta como e forza di un comunidad, di un sociedad manera esun di San Nicolas y Aruba.
Awor lo bay over na explora e oportunidadnan pa realiza e proyecto, cualnan ta mustra di ta hopi positivo. Despues di finaliza e estudionan y tur cos ta positivo pa realiza e obra, e lo bira uno di brons, di tamaño real,lo tuma aproximadamente 4 luna pa wordo finaliza yposiblemente lo por bin na entrada di San Nicolas unda ta yama bon bini na tur hende na e ciudad Caribense, na e capital di nos historia cultural.
Esaki ta un otro tipo di proyecto relaciona cu arte den espacio publico na unda arte ta wordo haci accesibel na comunidad henter y cu un componente educativo, cual ta un obhetivo di Ministerio di Cultura.

Expresionnan haci den e articulo aki no necesariamente ta refleha opinion di ArenaPoliti.co