Despues di 6 dia di tratamento di presupuesto 2016 e Gobierno di sr. Eman a bira uno De-facto. Su Gobierno no tin derecho di existencia mas, tanto bal nan periodo constitucional ta te cu 2017 pasobra ora cu bo mesun parlamentarionan retira nan apoyo di bo maneho bo mester saca bo conclusion. Sr. Eman a core bay na su radio comprometi pa cuminsa campaña di biaha despues cu parlamentario Mervin Wyatt Ras y Marisol Lopez Tromp a vota contra e presupuesto di 2016. E resultado despues di casi 4 ora di schorsing a termina den anochi laat anto cu 11 a vota ‘’voor’ y 10 ‘contra’. Fraccion di MEP a bin ta hibando un oposicion al caso y remarcabel cu fo’i oposicion mes Movimiento Electoral di Pueblo ta logrando cosnan grandi pa e digno pueblo di Aruba bao liderasgo di Sra. Evelyn Wever Croes. Fraccion di PDR tambe a vota contra e presupuesto. E parlamentarionan tambe a presenta 28 mocion y 1 amienda. Entre e mocionnan tawata tin 2 mocion di desconfiansa. E mocionnan di MEP tawata dirigi riba retira confiansa den Minister Arthur Dowers y Minister Benny Sevinger. Parlamentarionan di MEP y sr. Bikker (PDR) a sostene e mocion di desconfiansa contra Minister Dowers, mientras cu tur parlamentario di AVP a vota contra e mocion. Pa loke ta trata e mocion di desconfiansa contra Minister Sevinger, parlamentarionan di MEP, sr. Bikker (PDR) y sra. Lopez-Tromp (AVP) a sostene e mocion, mientras cu e otro 12 parlamentarionan di AVP a vota contra.

Mirando cu Raad van Advies (RvA) y College Financiele Toezicht (CFT) a bisa cu e presupuesto ta IRREALISTICO anto 2 parlamentario di AVP a desaproba e maneho di Gabinete Mike Eman su gobierno ta hacie uno De-facto. Minister Otmar Oduber a expresa 9 punto pakico e no ta apoya Gobierno mas despues cu e mes ta parti di e problema desde 2009 , awo e kier pretende di lubida e maneho desastroso entre 2009-2013, unda cu nos debe nacional a wordo redobla cu tur e consecuencianan cu esaki ta trece cu ne. Den apenas 20 dia Minister Oduber a cambia su ponencianan y ta orguyoso di partido AVP y e maneho hiba pa sr. Eman desde 2009, un politico cu ta mustra cu interes di partido y poder politico ta bin prome cu interes general y bienestar di nos digno pueblo. Minister Sevinger y Dowers, Hooyboer y De Meza tur ta de facto mirando nan decisionnan ehecuta y e daño ocasiona na e pueblo di Aruba. “Het begrotings- of budgetrecht  wordt wel aangeduid als het parlementaire moeder-recht bij uitstek”. Sr. Eman a comete un desaster cu pais Aruba anto e no tin nada di ta orguyoso di dje. E ley di presupuesto ta esun mas importante den nos constitucion y si esaki no ta wordo aproba pa “mayoria” e gobierno den cuestion tin cu bay cas; op staande voet, per direct, di biaha.

Expresionnan haci den e articulo aki no necesariamente ta refleha opinion di ArenaPoliti.co