ORANJESTAD – Minister President Mike Eman tin un bista positivo pa loke ta e aña nos dilanti. E plan riba termino largo cu su Gobierno tin fiha ta canando su caminda y tur loke bin aserca ta djis hacie ainda mas prometedor. Esey ta e caso cu reapertura di refineria na San Nicolas. E mandatario a splica recientemente durante un entrevista na radio, cu e esfuersonan di parti di Gabinete Mike Eman II ta bayendo satisfactoriamente y ta spera tur cos concreta den prome trimester. Si esey no ta e caso, Gobierno tin un plan B prepara di cual tambe pais Aruba ta sali beneficioso.

E prome mandatario a indica cu colega de Meza ta premira cu den luna di maart ta firma acuerdo pa e ora ey, di biaha na april cuminsa cu e trabou di rehabilitacion y inversion. Tambe lo tuma luga e traspaso di e refineria pa pais Aruba. “Nos a tuma e decision cu no ta laga mas aña transcuri den incertidumbre,” Premier Eman a bisa. Tur experto cu a papia cune ta coincidi cu e pais cu ta mas adecua pa haci e refineria factibel, ta uno cu conexion of acceso na e crudo di Venezuela, paso ta pa e tipo di crudo ey e refineria aki traha.

Ya caba a fiha posicion cu, si pa cualkier motibo, reapertura no ta posibel, anto Gobierno ta pidi Valero pa haci e tereno na San Nicolas liber. Esaki ta representa un inversion di 100 pa 200 miyon Florin. Tambe e compania Mericano lo haci traspaso di e seccion di mercadeo cu tin un balor di 60 miyon Florin, cual Gobierno tin intencion di bende. “Reapertura di e refineria tin un impacto enormemente grandi pasobra 600 hende ta haya trabou directamente den e refineria y 2000 persona ta haya trabou como contratista.” Adicional e acuerdo cu Citgo ta inclui un suma di 20 miyon dollar pa lease e refineria y otro 10 miyon Dollar pa paga na belasting, ambos suma ta pa aña.

“Esey kier men cu nos ta papiando di casi 200 miyon Florin extra di entrada den 2016,” Premier Eman ta splica. E sumanan aki no ta inclui den e presupuesto, algo cu Gabinete Mike Eman II a haci deliberadamente pa ta mas conservativo posibel. “Nos no kier pa ningun hende bisa cu nos ta biba di ilusion of nos ta biba di un expectativa. Basa riba loke tin duro caba nos ta sigur cu nos presupuesto ta alcansa su metanan y tur esaki ta djis hacie mucho mas grandi y positivo,” tabata e declaracion di e mandatario, kende a añadi cu den un escenario asina, te hasta ta papia di un prespuesto balansa na final di 2016 bayendo pa 2017 y tur su impacto economico positivo.

Expresionnan haci den e articulo aki no necesariamente ta refleha opinion di ArenaPoliti.co