Awe partido MEP ta celebra su 45 aña di existencia! 

Awe 9 di februari 2016, MEP ta celebra su 45 aña di existencia. 45 aña di lucha y sacrificio, 45 aña na defensa di e pueblo Arubano, pero tambe 45 aña di logronan historico pa pais Aruba.
Tabata riba diamars 9 di februari 1971 cu nos lider inmortal Betico Croes a funda e prestigioso partido Movimiento Electoral di Pueblo (MEP). Desde principio caba partido MEP a pone su dilanti e ideologia social-democrata, nos structura estatal y union di henter e pueblo Arubano, sin distincion di rasa, color, religion, status social etc.

E prome directiva di MEP 
E decisionnan tuma riba dia 9 di februari 1971 a ser ratifica durante e promer Congreso di MEP cu a tuma lugar dia 14 di februari 1971 den teatro Rialto na Playa. Durante e congreso aki, dirigentenan di e partido U.N.A. (Union Nacional Arubano) tambe tabata presente y nan a dicidi di uni nan mes na e partido recien funda MEP.
E promer directiva di MEP tabata consisti di lider y presidente Betico Croes y e miembronan Efraim de Kort, Daniel Leo, Jossy Croes, Sixto Feliciano, Watty Vos y Cezare Terzano.
E personanan presente di parti di UNA tabata Frans Figaroa, Dodo Figaroa, Poy Werleman y Tommy Leest.
MEP ta wordo considera como un partido prestigioso. Un partido cu desde su fundacion a keda un partido grandi y esaki durante 45 aña largo, ya cu MEP despues di su promer salida cu 7 asiento nunca den e eleccionnan siguiente a yega di baha bao di 7 asiento. Den henter Reino Hulandes no tin un partido politico cu un trayectorio asina impresionante!

Crecemento grandioso di MEP
Locual ta resalta den henter e trayectorio di MEP ta e sinceridad cu e partido aki ta desplega den e comunidad Arubano. MEP ta un partido cu desde su fundacion te cu awor apenas a conoce tres lider, esta Betico Croes den feliz memoria, sr. Nelson Oduber y nos actual lider sra. Evelyn Wever-Croes. MEP ta un partido di cual despues di morto di Betico Croes a wordo bisa na Hulanda “Betico dood, MEP dood”. Sinembargo bao liderazgo di sr. Nelson Oduber partido MEP a sigui crece den un forma grandioso, estableciendo recordnan impresionante durante e eleccionnan na 2001 y 2005. Pa yega na un trayectorio impresionante asina ta evidente cu e partido mester a haci hopi cos bon pa e comunidad aki. Y esey MEP a haci den un forma cu no ta laga duda atras. Durante e ultimo 45 añanan MEP a traha incansablemente pa e desaroyo di Aruba, tanto riba tereno estatal, economico, social, cultural, deportivo etc. MEP como un partido cu ideologia social democrata semper a tene na bista cu e ser humano y specialmente esnan di menos recurso mester ta central den e desaroyo aki.

Un lucha tenaz
Riba e tereno estatal nos partido tabatin problemanan serio cu e sistema politico di e structura di Antiyas Hulandes ya cu Aruba tabata den minoria compara cu e isla mas grandi, esta Curaçao.
Despues di su promer salida exitoso na 1971 Betico Croes, otro miembronan di partido y e militancia a pasa den temponan masha duro mes na unda nan mester a hiba un lucha tenaz contra esnan cu semper a pone trampanan den caminda pa nos no logra nos libertad, esta nos Status Aparte. Danki na su carisma, perseverancia y determinacion combina cu e respaldo incondicional di su pueblo, Betico Croes y MEP a logra pone e politiconan Antiyano y Hulandes y hasta su opositornan local respeta deseo di pueblo. Pa por a yega asina leu Betico Croes mester a haci hopi sacrificio, drama sanger, sodor y lagrima pa realisa e anhelo di nos pueblo pa su libertad.
MEP ta e partido cu a percura pa nos simbolonan di union y libertad, esta  Himno y Bandera, nos moneda, nos ortografia, nos propio Constitucion, Gobierno, Parlamento, nos propio Gobernador, Banco Central etc..

Augustus Scur
Fuera di e Referendum na maart 1977, e accionnan di augustus 1977 tabata determinante den e lucha pa Status Aparte y ta danki na e accionnan aki Aruba a wordo scucha door di Hulanda.
Finalmente e deseo di Aruba a wordo cumpli durante e Conferencia di Mesa Rondo na Maart 1983 na unda nos derecho di autodeterminacion a ser reconoci y aproba pa nos sali for di Antiyas dia 1 di januari 1986 y cu nos lo bira independiente dia 1 di januari 1996 den un Man Comunidad cu Hulanda. E fecha di Independencia a wordo impone riba Aruba pa por a sali for di Antiyas. E tempo ey Betico Croes a bisa bon cla cu MEP lo acepta por lo pronto e condicion aki, pero cu nos lo bolbe. Y ta cu honor dia 13 di juli 1990 ex-Minister President Nelson Oduber a percura pa scrap e fecha di Independencia 1996 for di den Statuut, pero manteniendo e derecho pa bira independiente dia cu e pueblo aki den un referendum dicidi esaki den su mayoria cu aprobacion di 2/3 parti di Parlamento, cual ta un garantia solido y responsabel.

Algun proyecto y logro di MEP
E proyectonan cu a wordo ehecuta door di e gobiernonan di MEP durante e ultimo 45 añanan ta innumerabel. Locual a resalta ta cu tur e proyectonan aki a contribui grandemente na e calidad di bida cu nos tin actualmente. Antes promer cu Status Aparte e desaroyo economico tabata hopi limita. Nos isla no tabatin e instrumentonan economico den man pa desaroya nos economia manera nos ta desea. Ta danki na e logro di Status Aparte na 1986 cu MEP a realisa, Aruba a haya e instrumentonan economico pa por logra desaroya e pais aki.
Algun di e proyectonan grandi cu a wordo realisa door di MEP durante e ultimo 45 añanan ta: Waf di container, Plan Sasaki pa desaroya henter e area turistico, edificionan di Domeinbeheer, Aduana, Ontvanger, SVB, Biblioteca Nacional, MTS, MAO, FCCA, Arubus N.V., APA N.V., WEB N.V., Elmar N.V., Setar N.V., oficinanan auxiliar di gobierno, ampliacion di Zona Franca, pista di aterisahe, renobacion y construccion di  stadionnan deportivo, casnan di pueblo rond Aruba, construccion di centronan di bario, Idefre, Instituto di Cultura, Lotto pa Deporte, planta di purificacion di awa,  wardanan di polis, Hotelvakschool Bushiri, Sporthal, Centro Medico San Nicolas, construccion di careteranan, construccion di schoolnan etc etc. Un otro logro importante tabata e reapertura di e refineria Coastal na 1991. Tambe e firmamento di un acuerdo cu ‘SACE’, unda a trece un solucion den e problema di garantianan. E acuerdo cu Hulanda na unda 250 miyon florin di Plant N.V. a pasa pa Aruba ta un logro historico den cual ta demostra un biaha mas cu MEP semper a goberna cu curashi, perseverancia y determinacion.

Gradicimento di lider di MEP
Awe cu MEP ta cumpli 45 aña lider di partido sra. Evelyn Wever-Croes ta desea di gradici un y tur cu a funda  y guia e partido manera Betico Croes den feliz memoria, nos lider honorario Nelson Oduber, tur cu a participa riba lista di partido den e tur e eleccionnan cu MEP a bay, Conseho di partido, Directiva di partido, nos lidernan di bario, nos presidentenan, Forza Femenino Grace, YEGA, nos militantenan, simpatisadornan, votadornan y un y tur cu a sostene MEP durante 45 aña largo. Na esnan cu a aparece riba lista y cu a bay laga nos, un palabra di gratitud y aprecio pa tur locual nan a haci pa MEP y cu nos Creador duna nan sosiego eterno.

MEP semper di pueblo, cu pueblo y pa pueblo.

Expresionnan haci den e articulo aki no necesariamente ta refleha opinion di ArenaPoliti.co