Votacion riba Presupuesto 2016 tin tur hende ta papia keto bay, a pesar cu normalmente Carnaval ta ocupa tur mente. A sinti un temblor den Staten net despues di mey anochi ora cu parlamentario Sra. Mervin Wyatt-Ras a vota contra y pa caba di corona obra presidente di Parlamento, Sra. Marisol Lopez-Tromp tambe a vota contra e presupuesto. Nada nobo. Aña pasa tambe Sra. Lopez-Tromp a vota contra Presupuesto 2015. Sr. Herdé a keda tur irita pero el a siña respeta opinion di otro, aunke e no gusta. Pa un cabey Sr. Herdé y su coleganan no a BAY CAS BEK, pero Chichi ta kere cu loke ta irita mas ta cu e actitud aki di e dos parlamentarionan menciona ta HABRI MENTE di pueblo...

Supuestamente no a conta entrada di apertura di e refineria den Presupuesto 2016, pero esaki ta hustamente loke parlamentario Sra. Mervin Wyatt-Ras ta contradeci. Segun por compronde di su persona, e presupuesto parce cu conoce un 'embeyecemento' cu no ta klop. Sra. Marisol Lopez-Tromp ta mustra riba e hecho cu gobierno no a corta den propio gastonan, loke ta bay contra di acuerdonan haci cu entre otro CAFT. El a indica claramente di ta mira espacio pa 'ahusta' gobierno su gastonan. Lo ta cu gobierno ta conta riba entrada di GAS y PETROLEO pa resolve e problemanan di e pais aki? Esaki sigur no ta SOSTENIBEL!

Otro cos tabata e comportacion di algun parlamentario y minister den e siman di reunion. E 'bullying' (termento na Papiamento) a sigui atrobe te cu Chichi a haya debor. Gabinete Mike Eman tin 7 aña na mando y ainda ta punta dede riba e gobernacion anterior di Gabinete Nelson Oduber. Ki dia ta stop di manipula pueblo cu 'pasado' pa tapa problema manera e Presupuesto 2016. Esaki ta e aña di 'pre-campaña”' pero Chichi sa caba cu e no lo opta pa vota pa niun di e dos partidonan mas grandi di Aruba. Lubida! Eleccion otro aña lo trece sorpresa pa hopi hende. Pueblo, ban vota consciente otro aña: ora nan bin cerca bo cu promesa di campaña bunita, corda puntra KEN y CON ta paga!

Wel, wel! Aruba ta asina sumergi den e vibracion negativo cu awor 'malo' tin cu mustra 'bon' basa riba argumento fofo cu den pasado no a tuma paso contra malhechornan y awor anto tampoco, awo mester ignora esunnan cu a comete cosnan robes den presente. Chichi ta papia di e 6 duaneronan cu a keda suspendi. No ta interesa cu den pasado cierto hendenan a haci mescos of pio y no a wordo castiga, esey no ta hustifica bo accion. Ta ki dia ley a cambia pa boso? Pero Chichi ta kere cu tur minister y parlamentario cu a y ta kibrando ley, mester wordo investiga y castiga tambe. Ta ‘juist’ nan cu tin cu duna un bon ehempel, ta laga hopi di desea. Riba dje nan ta scapa pasobra nan ta ‘niet zomaar iemand’. Ta hopi cos tin cu cambia riba e luga aki.

Sin duda, Prome Minister Mike Eman ta un bon orador. Den Parlamento el a duna su disertacion, cu potret pa ilustra su 'hazañanan' di shete aña di gobernacion. Ora Chichi a bay drumi, ainda tabata tin algun frase y palabra cu a keda colga den mente. Pero mainta ora Chichi a bay supermercado Chines pa cumpra pan y algun otro cos, Chichi a 'bin bij' mesora para na caha pa paga productonan cu, apenas un par di dia atras, tabata costa menos. E realidad di tur dia no por wordo ignora pa pueblo, ni cu si nan kier. E GOLPI ta unda mas e ta haci dolor: den bo CARTERA! Ningun disertacion bunita ta cambia esaki. Te awe pueblo ta wardando riba un CANASTA BASICO cu por lo menos 60 pa 70 producto basico y saludabel cu prijs stipula pa gobierno. E argumento cu Aruba tin 'mercado liber' ta un fli cu no ta subi; e unico cos cu e 'libertad' aki a haci tabata di habri caminda pa 'libertinahe' unda ta HORTA pueblo SIN PIEDAD NI CONTROL.

(www.aboaruba.org, This email address is being protected from spambots. You need JavaScript enabled to view it.)

Expresionnan haci den e articulo aki no necesariamente ta refleha opinion di ArenaPoliti.co