E tambe a contribui na un debe nacional riba 4.1 biyon! 

Ora cu un mandatario manera sr. Paul Croes ta duna declaracionan relaciona cu interes den nos hobennan ta bon pe tuma un rato di reflexion pa pensa con e como hoben a perhudica e futuro generacion. Laga nos no ignora e hecho cu e tambe ta culpabel pa e dilema financiero cu nos pais a wordo hinca aden y hasta por bisa cu e la yuda pa hasi'e peor! 

For di comienso den politica y ora cu e como parlamentario a eherce e funcion como presidente di parlamento nunca e la para e trein di mal maneho financiero di Gabinete Eman. Ta for di 2010 e gobierno cu e la sostene a cuminsa cu malgastamento di fondonan publico y lamentablemente como hoben nunca a cuestiona deficitnan exorbitante ( 4.4% na 2010, 7.1% na 2011, 9,8% na 2012 y 7,2% na 2013 y 8,5% na 2014) di e gobierno. Un persona di principio , critico y cu tin nos hobennan na pecho nunca no mester a tolera cu nos debe nacional surpasa 4.1 biyon den 7 aña! Ta tristo pasobra ni den historia di nos Status aparte prome cu AVP a tuma mando no tawatin un desaroyo negativo asina. 

Pero no ta solamente como parlamentario e la tolera y permiti gobierno gasta di mal forma sino tambe su ambicionnan. Ta importante pa trece padilanti cu sr. Paul Croes a laga su propio interesnan haya preferencia riba esunan di pueblo y di nos hobennan. Den caso specifico di Minister Paul Croes e la pone su interes pa yega na un posicion centraal den gobierno como minister sin cu un rato e la pensa riba e "aftermath".  

Kiko ta e consecuencia? Danki na e y su ex colega  nan deliberadamente a aumenta gastonan di gobierno cu un averahe di 16.2 miyon extra! Contesta di su excelencia Gobernador tawata cla no amplia ministerio pero toch su interes a bai riba esunan di nos hobennan ( por mira anexo) Djis imaginabo cuanto cos por a wordo hasi cu e placa aki. Segun datonan conoci construccion di un Havo/Vwo school na Noord lo a sali aproximadamente 18 miyon florin. Esei ta nifica cu den menos cu 2 aña caba e scol aki por tawata finalisa. Awor si berdad bo tin hobennan y e futuro generacion na pecho manera e minister aki ta pretende a) pakiko bo a sostene maneho di malgasta? b) pakiko bo a bira minister djis pa briya cu posicion y costa zowel pueblo y hoben placa? Pakiko no a usa sentido comun pa goberna responsabel y frena malgastamento den cosnan innecesario enbes di fiha prioridad? 

Ta parce cu mandatarionan di Gabinete Eman y sr. Paul Croes como hoben a lubida cu niun hende ta goberna pa semper y tur cos tin un fin. E solo hecho cu nos debe nacional a acumula y surpasa 4.1 biyon den apenas 7 aña (ni durante un periodo di 1986 pa 2009) ta di condena pasobra ta e hoben ta e esun cu mas lo bai carga e cruz aki. Sigur hobennan di Aruba lo sa di indentifica y husga e falta di compromiso pa cu nan futuro. E ta importante pa corda cu e proceso politico ta uno continuo y no ta termina ora di eleccion. Pesei pueblo specialmente nos hobennan mester keda envolvi den e proceso prestando atencion na cada desaroyo pa despues tene mandatarionan responsabel pe decisionan robes cu a wordo tuma!

Expresionnan haci den e articulo aki no necesariamente ta refleha opinion di ArenaPoliti.co