ORANJESTAD – Un dia cu a spera cu hopi anticipacion, cu a traha hopi duro pa yega y cu esnan responsabel ta ricibi finalmente cu hopi satisfaccion y orguyo. Traslado di e operacion di carga di waf pa e waf nobo na Barcadera a keda completa diamars mainta, ora cu e prome dos barconan di carga a drenta waf y procesa. Minister di Asuntonan Economico, Ing. Mike de Meza a haci un inspeccion personal pa mira di cerca con e mudamento a bay y e operacion ta andando.

Cu awe tin un Waf di carga nobo na Barcadera, ta danki na e prioridadnan cu Gabinete Mike Eman I a pone su dilanti na 2009. Pa decadanan largo a papia tocante mudamento di e operacionnan di carga for di Oranjestad pa asina por duna e industria di crucero turistico espacion a desaroya mas ainda. E dos operacionnan, esun di carga y esun di crucero no tabata duna e espacio pa nan por desaroya. Awo cu e waf di carga na Barcadera ta den operacion, Aruba a logra un otro meta den su desaroyo economico.

Minister di Economia, ing. Mike de Meza a haya un recorido di e waf nobo na Barcadera for di director di ASTEC, Sr. Mike de L’Isle den compania di director di APA, Ing. Jossy Figaroa. Despues di esaki de Meza a expresa den palabra e momento grandi cu esaki ta nifica pa pais Aruba y su futuro. “Nos ta mira aki un waf cu hopi Gobierno a papia di dje, pero ta e gabinete aki a bin y ehecuta e proyectonan cu necesario y sumamente importante pa nos hiba Aruba na e siguiente pa cu nos economia.”

E prome impresion cu ta haya ora ta yega na waf di Barcadera ta cu finalmente pais Aruba tin e waf di carga cu e merece di tin. Rapidamente ta wak e diferencia enorme for di loke tabatin prome riba e tereno aki y con e infrastructura nobo ta esun cu mester tin pa atende e importacion y exportacion di un nacion. Entrada pa e trucknan tin su debido punto di siguridad, cu e edificio di ASTEC na banda pa atende tur aspecto di operacion, parkeo, etc. E grua ta resalta for di leu y e espacio paden ta suficiente amplio pa acomoda e cantidad di container cu Aruba ta ricibi awendia y pa por lo menos e proximo 50 aña.

“Ya e prome barco a drenta caba y ya nan ta test e operacion; tur cos ta canando bon aworaki,” asina Minister de Meza a bisa. E mandatario a recorda y resumi a trayecto tras di lomba cu elogio pa tur esnan envolvi y e dedicacion hinca den e proyecto. “Nos ta hopi contento pasobra na 2009 ora Gabinete Mike Eman I a drenta den gobernacion, esaki tabata un di e prioridadnan cu Prome Minister tabatin riba su lista di prioridad di proyecto,” e titular encarga di empresanan estatal manera Aruba Ports Authority, a indica.

Despues di hopi deliberacion y negociacion, a yega na e decision cu ASTEC, cu kende APA tin mas di 25 aña ta traha caba, ta e compania mas indica pa forma parti di e proyecto. E decision aki a produci un resultado positivo. Ta canando segun schedule y dentro di e presupuesto, algo cu te hasta e paisnan di mas grandi dificilmente por logra, y na Aruba ta danki na un tremendo trabou den ekipo.

“APA ta doño como e Autoridad di Puerto Maritimo y ASTEC ta e operador. Tur actividad riba e waf nobo di Barcadera ta bou supervision directo di ASTEC y riba dje e supervision di Aruba Ports Authority N.V.,” manera Minister di Meza a splica. Departamento di Douane como tambe Inmigracion tambe ta riba e tereno eherciendo nan funcion.

Expresionnan haci den e articulo aki no necesariamente ta refleha opinion di ArenaPoliti.co