Ministro ta parce di ta intransigente. 

Diaberna ultimo AHATA, sosteni dor di Camara di Comercio y ATIA, a tene un reunion cu Ministro di Turismo pa cu e concepto di ley referente all-inclusive. Ora cu a kere cu lo tin espacio pa yega na un posibel acercamento riba e tema lamentablemente a bin resulta cu Ministro di Turismo a rabia pasobra AHATA, Camara di Comercio y ATIA no ta comparti su opinion referente e concepto di ley.

E situacion aparentemente lo a escala na un nivel cu Ministro lo a yama e Asociacion di Turismo pa mentiroso. Esaki ta poco ironico paso e propio Ministro no kier comparti un estudio di 2015 haci pa PWC, probablemente pasobra e estudio lo no ta cuadra cu deseo di e Ministro. En todo caso tur fraccion den Parlamento a exigi copia di e estudio di PWC di 2015.

Hecho ta cu tur fondo di ATA ta bin for di room tax genera pa e hotelnan y ta surpasa 100 miyon florin pa aña.
Ironicamente e hotel cu probablemente ta genera mas room tax cu tur otro ta Riu, precisamente un hotel basa riba e plataforma di cobranza all-inclusive cu tanto Gobierno ta atacando fuertemente.
E cambio den maneho di Gobierno aki a bin despues cu a dicidi unilateralmente sin debido estudio cu diripente all-inclusive ta malo y comosifuera e lo ta fuente di tur problema na Aruba. 
Stranjo ta cu no por corda cu AVP a bay eleccion cu un ley di un magnitud asina, pues por puntra hasta si e tin mandato electoral pa cu esaki. 
En todo caso si e ley aki pasa  manera cu e ta y keda intacto, tur restaurant y bar cu tin vergunning bow di Vergunningsverordening por tene cuenta cu den futuro Gobierno por bay dicta ta cuanto plato of bebida nan mag di bende pa dia. Un sistema cu simplemente ta borda na communismo moderno. 
Hecho ta cu e concepto di ley den su forma actual ta contra e derecho humano di por tin y maneha propiedad, y pues lo por tin efectonan macro-economico negativo. Esaki lo por tin consecuencia cu entre otro e seguridad juridico (Gobierno cu e ley ta cambia e reglanan na caminda) y e clima di inversion lo wordo afecta negativamente. Un que otro lo por trece cune cu por ehempel CAFT lo sinti su mes yama pa forma un opinion riba e ley. Gobernador en todo caso a base di articulo 20 y 21 di e Reglamento pa Gobernador di Aruba lo mester bay evalua e ley, si e ley wordo aproba pa un mayoria den Parlamento, cual por nifica un otro decreto pa e Gobierno actual (“KB”). 
PDR en todo caso no  ta wak motibo pa Gobierno bay riska y laga e concepto di ley aki yega ta na un extremo asina, pues PDR ta bolbe haci un apelacion na Gobierno pa fria cabes y bolbe na mesa cu e gremionan cu ta maneha nos industria di turismo. 
Gobierno no por bay experimenta cu e unico pilar economico cu a resta nos pais te awo.

Expresionnan haci den e articulo aki no necesariamente ta refleha opinion di ArenaPoliti.co