Benny Nisbet (PPA): "Bosman desciminando atrobe…..Unda e voz di parlamento di Aruba ta keda den esaki?"
E miembro di VVD sr. Andre Bosman a bolbe hasi expressionan contra e ciudadanonan di Reino di Caribe cu e meta pa stop nan pa emigra pa Hulanda. E ta cualifica nan pa ‘kansarme antillianen’ cu ta bin Hulanda y aki e ta referi na e islanan di Aruba, Curacao y St. Maarten y no tin e nivel di ensenansa cu ta duna nan un oportunidad di logra un trabao den e mercado Hulandes/Europeo.
Na prome lugar Aruba su ciudadanonan tin 30 anja cu nos no ta forma parti mas di e constellacion Antiyano y Curacao y St. Maarten tin 5 anja cu nan no ta den Antiyas Neerlandes y Antiyas Neerlandes mes no ta existi mas. Sr. Andre Bosman ta kana hopi atras !!
PPA no por comprende cu miembronan di 2de kamer por trata ciudadano di paisnan cu ta forma ‘Reino Hulandes’ di e forma aki !! Esaki ta descriminacion den tur sentido di palabra !!
E pregunta si cu PPA tin nos ta dirigi na parlamento di Aruba cu ta nos representacion constitucional riba nivel di Reino Hulandes …….Unda e voz di Aruba su parlamento ta den e ‘issue’ aki ? No bin cu storia cu sr. Andre Bosman no kiermen e arubiano pero e jui corsow of di St. Maarten. Den su vocabulario e no ta hasi distincion !! Y e posibel concepto di ley cu e ta referi na djele cu lo prohibi e arubiano cu sea no tin trabao na Aruba of pa otro motibo dicidi pa muda pa Hulanda ta papia di e ciudadanonan di e pais caribense cu meta cla riba Aruba, Curacao y St. Maarten. E ‘BES” eilanden officialmente ta forma parti di Hulanda y no ta cai bao di e cualificacion aki.
PPA no por comprende cu a kaba di tuma lugar un asina jama reunion di IPKO y nos no a tende mucho di esaki pero awor cu IPKO a termina ….sr Andre Bosman ta gritando atrobe cu e topico cu ta nada mas cu descriminacion. Pa colma miles di ser humano di otro pais ….. manera di Syria etc si ta bonbini na Hulanda pero aparentemente e poblacion di e islanan cu Hulanda a colonisa un 300 anja no. Y Hulanda ainda tin cuenta pa duna y eventualmente paga pa e abuso durante e periodo colonial !! Envez di respeta otro y duna otro oportunidad pa biba e abuso aki ta continua keto bai.
PPA ta contra e gritonan constante cu e meta aki !! PPA ta di opinion cu e principio di respeta ciudadano di Reino Hulandes mester keda intacto na prome lugar !! Na di dos mester tin un separacion constitucional di unda kada ciudadano ta bini cu ta causa problema na Hulanda….Kada isla mester para responsabel pa educacion di su juinan y ora nan ta na Hulanda, Hulanda mester por impone cierto educacion riba esnan cu no por logra un trabao na Hulanda y juda nan den esaki pero grita sclama cu kier evita cu nan ta bin ta simpelmente descriminacion.
PPA ta di opinion cu si 2de Kamer jega na un concepto di ley asina den futuro un delegacion di Aruba mester sali pa Nacionan UNI y pa Union Europeo pa apunta e descriminacion aki Internationalmente. Aruba a opta pa un Status Aparte pa keda parti di Reino Hulandes despues cu den prome instancia Aruba a hanja un Independencia den nos stoma. PPA tabata e UNICO partido cu NO a vota pa e LEY cu a fiha Aruba su independencia y PPA tabata contento cu den curso di tempo otro partido cu Si a vota pa Independencia a kana e ‘caminda di canossa’ pa scrap e fecha di Independencia y mantena e posicion di Status Aparte den Reino Hulandes.
E escogencia pa nos Status Aparte ta basa riba varios argumento serio y profundo. Un di nan ta pa Aruba su pueblo keda cu e ‘nacionalidad y pasaporte hulandes’ cu ta trece cierto beneficio cunele e.o. cu nos ciudadano den temponan dificil por establece nan mes pa un periodo na Hulandes cu tur derecho como ciudadano hulandes. Por lo pronto PPA no ta mira cambio necesario dentro di e posicion cu Aruba ta occupa den Reino Hulandes.
Den concepto di PPA e partidonan/fraccionan representa den Staten ta hopi debil riba e topico aki !!
Fuera di esaki PPA ta di opinion cu pais Aruba mester dedica mas atencion na nos ensenansa pa prepara generacionan cu ta sigui nos cu nan lo tin mas posibilidad economico tanto na Aruba como den Reino Hulandes.
Aruba, 17 di juni 2016 Benny Nisbet,
Lider Politico di PPA
Expresionnan haci den e articulo aki no necesariamente ta refleha opinion di ArenaPoliti.co