Tur cos ta mustra cu atrobe Minister Eman no ta bay cumpli cu locual e mes a firma pe den e diferente protocolnan cu Hulanda. E ta bisto cu Minister Eman no tin e boluntad pa drecha nada na e situacion financiero di nos Pais cu e mes a yuda dania. Pero Minister Eman no ta kibra su cabes ya cu e ta sigur cu tanten cu e ta haci e trabou di salesman pa Reino na Nacionnan Uni, Hulanda no lo tribi di kita e pen for di su man. Pasobra pa Hulanda e stul den Conseho di Seguridad di Nacionnan Uni ta mas importante cu bon gobernacion na nos Pais.

Hulanda pa interes propio ta keda sin actua
Desde 2014 nos por wak cu tin un disputa formal entre e Ministernan di Reino (Hulanda) y Gobierno di Aruba. E motibo ta simpel. E mal maneho financiero di Gabinete Eman ta pone cu Hulanda no por keda man crusa y mira nos Pueblo bay perdi na man di Eman. Hulanda a bin cu KB y despues cu CFT, pero Mininster Eman a keda haci locual e kier. Den e situacion asina cu e Gobierno di Aruba no kier drecha e desaster cu ela haci, Hulanda segun nos Statuut mester actua y kita e pen for di Minister Eman pa e no sigi malogra nos Pueblo. E ultimo aki mester a pasa caba na mei 2015, pero Hulanda no a actua kitando e pen di Minister Eman. Enves di esaki, Hulanda a djies firma un protocol cu Minister Eman dunando e mas rosea politico lagando nos Pueblo na man di mal gobernacion. Y tur esaki pa motibo di e interes propio di Hulanda pa usa Minister Eman pa haci propaganda pa asina Reino por yega na e stul den e Conseho di Seguridad di Nacionnan Uni.

Un stul no por ta mas importante cu e bienestar di nos Pueblo
Nos Pueblo a base di nos Statuut tin derecho di wordo bon goberna. Ora cos bay robes, Hulanda tin e obligacion tambe di percura pa nos Pueblo y no por ta asina cu Hulanda ta keda consenti Minister Eman su mal gobernacion djies pasobra nan ta saca probecho di su trabou como salesman. Hulanda mester compronde cu e Pueblo di Aruba tambe tin dignidad y un stul no por ta mas importante cu e bienestar di nos Pueblo.

Minister Plasterk mester actua enves di bin haci show cu agenda scondi
Pesey ta di spera cu Minister Plasterk den su proximo bishita pa Aruba no bin wanta man di Minister Eman atrobe pa haci show pa calma tension den Pueblo. Nos ta spera cu Minister Plasterk e biaha aki por kita e pen di Minister Eman pa asina e stop di malogra e Pais aki mas cu ya caba ela hacie. Y si acaso no por, anto mihor keda na Hulanda y spaar Pueblo di mira show cu agenda scondi.

31 oktober 2015

Expresionnan haci den e articulo aki no necesariamente ta refleha opinion di ArenaPoliti.co