Den fin di siman a sali dos publicacion den prensa Hulandes di AVP y di MEP. Den e publicacion di AVP, un entrevista extenso cu e lider di fraccion di AVP, ta trata e relacion entre Aruba y Hulanda, e maneho di menasa sin trece solucion di Hulanda, e violacion di Statuto y e echo cu minister Plasterk ta nenga di ehecuta un mocion di Parlamento di Hulanda y un acuerdo di e parlamentonan di e cuatro paisnan di Reino pa institui un organo imparcial y a-politico pa atende cu conflicto entre e paisnan di Reino. Un bon entrevista cu den su esencia ta para pa respet pa parlamentonan, pa miho relacionnan den Reino, pa atende cualkier problema den un forma di busca solucion enbez di confrontacion. Un expresion di defensa di autonomia di Aruba. E entrevista aki a sali den e corant Antilliaans Dagblad di diabierna pasa.

SUSHEDAD
Den e publicacion di partido MEP den e corant De Telegraaf di Hulanda, e periodista Hulandes Edwin Timmer a publica un articulo basa completamente riba e gañamento y lastramento di hende den sushi, di miembronan y fanaticonan di MEP. E mes un acusacionnan y gañamento cu Ministerio Publico y corte a tira fo'i bentana of a nenga di trata, a wordo publica pa e parti di publico Hulandes cu gusta e tipo di sushedad over di islanan den Caribe. Mescos cu den corte, niun caminda den e articulo ta presenta niun preuba, pero ta ripiti e mes un acusacionnan cu aki na Aruba nos a lesa den prensa local, na radio y television di MEP y cu a wordo nenga door di OM y Corte. Esencia di e articulo ta pa lastra gobernantenan di AVP y susha nomber di Aruba.
Mientras cu e articulo di AVP ta sali na defensa di Aruba, ta mustra riba e maneho incorecto y ilegal di Hulanda manera Raad van State mes a cualifik'e, e articulo di MEP ta pa mancha nomber di Aruba. E meta di MEP ta pa duna Hulanda mas excusa pa mete cu Aruba. MEP no ta interesa con Aruba a lanta para atrobe di e desgracia cu MEP a laga nos pais aden apenas seis aña pasa. Nan meta ta, manera a wordo bisa hopi biaha caba, pa purba drenta gobierno pa sigui cu e fiesta di "friends and family". No door di voto di pueblo, pero door di menasa, daña ambiente na Aruba, spanta inversionista, ofende doñonan di trabou, presiona sindicalistanan, lastra ken cu no ta di acuerdo cu nan y gaña gaña gaña. E comparacion di e dos publicacionnan aki di AVP y MEP so caba ta mustra e diferencia di ken ta traha pa Aruba y ken ta daña pa Aruba.

Expresionnan haci den e articulo aki no necesariamente ta refleha opinion di ArenaPoliti.co