Hunto cu su colega Minister Mike de Meza, Prome Minister di Aruba Mike Eman tabata un invitado di Vice-Presidente Joe Biden na e cumbre importante ‘Caribbean Energy Security Summit’ cu a tuma luga na Washington. Eman tabatin un rol visibel pa por a splica tur loke Aruba ta haciendo riba tereno di sostenibilidad. Vice-Presidente Biden a menciona Aruba den su discurso den forma positivo y a presenta Mike Eman como e ehempel di Caribe. Por conclui cu presencia di Aruba na e cumbre tabata exitoso ya cu wowo di mundo tabata dirigi riba e top aki y por a scucha con Aruba ta moviendo den e bon direccion. 

Den retrospectiva Prome Minister Eman a bisa di ta contento di e encuentronan cu e tabatin den e dianan cu ta tras di lomba. “E cumbre tabata un iniciatva di Vice-Presidentre Mericano Biden, kende a pone central e maneho di energia den Caribe como un punto na cual Merca kier duna su contribucion.” Eman a splica cu esaki pa Aruba ta di gran importancia pasobra pa un pais poderoso y influyente manera Merca sostene e area di Caribe den su ambicionnan pa haci e conversion di energia convencional pa energia sostenibel, ta algo sumamente grandi.

“Aruba ta haciendo avancenan inmenso riba e tereno aki. Esaki a resalta tambe y tabata motibo cu durante e dianan aki di parti di Vice-Presidente di Merca, di parti di State Department, Congreso, Senado y Department of Energy, cada un na nan forma a crea un plataforma pa duna hopi atencion na Aruba como lider den e paisnan Caribense.” Eman a califica e momentonan aki masha importante pasobra hopi bes ta tuma iniciativa y liderazgo den e direccion aki y tin bes cu e no ta wordo mira di biaha y hopi pregunta ta wordo lanza. “Pero pa hopi otro – pa nos y tur esnan cu a sigui e desaroyonan e ultimo añanan - e ta un confirmacion cu e escogencianan cu Aruba a haci awe ta wordo reconoci door di VP di Merca mencionando nomber di Aruba na diferente ocasion durante e cumbre aki como un pais pionero, un pais cu ta duna liderazgo den e conversion y e vision. Awe por mira y tende con e pais mas poderoso di mundo y for di e posicion halto di Merca cu ta e Vice-Presidente, directamente den coordinacion y cu bendicion di e Presidente Mericano Obama, a pone Aruba central. Esaki ta hustamente door di e vision y e caminda cu nos a cana pa crea un pais sostenibel, riba tanto area di energia como riba otro areanan pa construi un comunidad mucho mas intenso, cooperativo, solidario y cu mas convivencia. Puntonan cu nos a bin ta accentuando, algun di nan ehecutando den diferente fase basa riba e vision di un desaroyo y un pais di prosperidad sostenibel cu a haya reconocimento den e plataformanan mas halto den mundo. Aruba no ta para su so.”

 Gobierno Mericano, articula den forma elocuente door di sr. Biden indicando cu Aruba ta e pais lider den Caribe riba e tereno di sostenibilidad, Congreso y Senado a brinda nan apoyo na e forma con Aruba ta haciendo su esfuersonan pa logra ta un pais sostenibel. Eman ta haya e apoyo di e pais mas poderoso na mundo un forsa adicional cu Aruba ta riba e bon direccion. E avenidanan cu nan ta habri pa Aruba logra e reto poni su dilanti pa 2020, ta algo cu mester di sosten di paisnan y institutonan manera Carbon War Room, Rocky Mountain Institute, TNO y oficina di Presidente y Vice-Presidente di Merca. Aruba ta riba e bon caminda”, Eman masha satisfecho a bisa.

Expresionnan haci den e articulo aki no necesariamente ta refleha opinion di ArenaPoliti.co