Evelyn Wever-Croes: Fraccion di MEP a reuni cu Camara di Comercio
ORANJESTAD – Parlamentarionan di MEP e siman aki a reuni cu secretaris, presidente y hunta di Camara di Comercio. Presente di parti di MEP tabata e lider Evelyn Wever-Croes, Xiomara Ruiz-Maduro, Ady Thijsen y Guillfred Besaril.
“Mi ta gradici Camara di Comercio pa a ricibi nos. Nos a toca varios tema di interes comun. Pa nos ta hopi importante pa scucha kiko ta e preocupacionnan di gremionan, y pesey nos a reuni cu Camara di Comercio tambe. Mescos cu Camara di Comercio, nos tambe ta hopi preocupa pa e situacion financiero di nos pais, y e pasonan cu mester wordo tuma. Tambe nos a papia tocante e efecto cu e falta di decision di parti di gobierno tin riba sector priva. Tipo di reunionnan asina ta yuda nos prepara pa e leynan na caminda, entre otro e presupuesto 2015. Nos ta haya e reunionnan aki sumamente importante, lamentablemente na mes momento cu e reunion aki nan a yama un reunion interno di comision di salud den parlamento, pero nos tur no por tabata tey presente debi cu nos a hasi e palabracion cu Camara di Comercio basta dia prome caba. E reunion cu Camara di Comercio tabata un bon reunion y nos a haya un mihor bista kiko Camara di Comercio su posicion ta den e situacion financiero di nos pais”, Evelyn Wever-Croes a duna di conoce.
Expresionnan haci den e articulo aki no necesariamente ta refleha opinion di ArenaPoliti.co