Manera ta conoci caba Gabinete Eman pa medio di 24 medida lo bai trata na baha e peso riba e presupuesto 2015 te añanan 2018 pa asina yega na un surplus den presupuesto di nos pais na 2018. Den e medidanan aki a inclui 2 cu specificamente lo mester bai yuda trece placa (genera entrada) den caha di gobierno cual ta 1) intensificación di cobranza di belasting y 2) reforma di impuesto.

Según e proyeccionan e cobranza di belasting intensivo cuminsando for di 2015 te cu 2018 lo mester bai genera un suma di aproximadamente 300 miyon florin. Loke si mester tene na cuenta ta cu esaki ta cifranan cu tin den archivo di departamento di impuesto y cu e suma aki no ta corecto tur ora. Un manera cu departamento di impuesto ta cobra e cuidadano ta door di mande un aanslag. E aanslag ta ilustra un suma di belasting cu bo debe y tambe e heffingsgrondslag (base riba loke ta cobra belasting). Pero tene cuenta cu tin posibilidad cu e cobransa no ta corecto of demasiado halto. Pesei e ta hopi importante pa e ciudadano pone atencion riba dje door di verifica aanslagnan na tempo p’asina por logra contradeci e suma imponi. Ley ta determina cu bo tin un periodo pa haci un “bezwaar” di 2 luna si encaso bo no ta di acuerdo cune. Nos a constata varios biaha cu e cobransanan no tabata tin base den lo absoluto ni tampoco tabata sumanan cu lo mester a wordo cobra. Den cuadro di esaki ta  recomendabel pa tur cuidadano ta atento cu asuntonan di belasting. Pa preveni y ta coriente lo ta bon pa tur cuidadano pidi un rekeninginformatie  pa por controla loke ta habri. Hecho ta cu no mester bai duna gobierno ni un chens di kita placa di mas for dibo!  Pa loke ta trata e reforma di impuesto pa modernis'e y hasi'e uno mas simpel, Gabinete Eman a calcula cu entre 2016 y 2018 un suma di 235 miyon florin lo bai wordo genera pa caha di gobierno. Remarcabel ta e hecho cu contenido di e reforma no ta conoci cual ta nifica cu no sa cual tiponan di belasting lo wordo aumenta of cual belastingnan nobo lo por bin aserca. Netamente CFT a indica cu no tin claridad di con lo hasi esaki y cu falta pa substancia esaki cu cifra. 

Ta di lamenta cu Gabinete Eman pa medio di e 2 medidanan aki lo bai “squeeze” delaster un cen preto for di e cuidadano. No ta por nada cu CFT ta señala den su rapport cu e cuidadano lo bai confronta su mes cu un aumento di 10% extra cu e lo mester bai paga na belasting (consecuencianan preliminar di financial transfer tax y reforma di impuesto). Algo cu bo por ta sigur di dj'e ta cu nos problema financiero ta uno grandi pasobra ta pronosticando cu ta te na 2034 nos lo sali for di e nubia scur aki. Ta di lamenta cu atrobe ta e cuidadano cu un biaha mas na man di Gabinete Eman tin cu bai carga e cruz y sacrifica mas di e placa cu nan no tin, djis pa scapa pellejo di un Promer Minister y full su gabinete. Realidad ta cu Gabinete Eman a demostra di ta sinonimo na irresponsabel, incapas y deficiente den su maneho desde cu e la cuminsa goberna! 

Expresionnan haci den e articulo aki no necesariamente ta refleha opinion di ArenaPoliti.co