Gabinete ME II: Padvindernan y Prome Minister Eman a inaugura rotonde di Tanki Leendert pa temporada di Pasco
Apertura di e prome Proyecto di Pasco di Servicio pa Comunidad y Bario, di Ministerio di Asuntonan General, no por a tuma luga sin presencia y mensahe di Paz di su iniciador: Prome Minister Mike Eman. Esaki a tuma luga diabierna anochi na e rotonde di Tanki Leendert cu a wordo dorna door di miembronan di e Grupo di Padvinders St. Dominicus di Noord cu patrocinio di Subway. Di e forma aki tambe a habri e ambiente di fin di aña pa pueblo di Aruba.
Servicio pa Comunidad y Bario, mas conoci como Team BoBario, pa algun luna caba a bin ta planeando e proyecto aki cu ta consisti di 14 rotonde y lo mester sirbi pa promove mas ainda e sentido di comunitario den comunidad di Aruba den fin di aña.
Prome Minister Mike Eman, apesar di e agenda pisa cu e tabata tin e dia ey, hunto cu su señora Doina a compaña e pueblo di Tanki Leendert riba e anochi special, cu a cuminsa cu e parada di padvindernan di St. Dominicus bou di ritmo di nan ‘drumband’.
Prome cu a cende e luznan, hunto cu e padvindernan, e mandatario a participa den declamacion di e poema “E cuatro Belanan” cu e palabra Paz. Despues di a menciona e palabra “Paz” e mandatario a bisa cu “esaki ta un momento di reflexion profundo. Nos ta para na inicio di e temporada di Pasco. Awe nos a bini hunto pa inauguracion di un trabou di iluminacion cu ta compaña nos semper den e temporada di Pasco,” Prome Minister Eman a bisa na e publico presente.
Sr. Eman a expresa su gradicimento profundo na tur cu a coopera cu iluminacion di e rotonde, e padvindernan cu nan boluntarionan y e sponser, Subway, cu haci e proyecto di rotonde di Tanki Leendert un realidad. “Pasa bon nochi, bendicion y pasa feliz dianan di Pasco,” Prome Minister a desea esnan presente. Despues a toca honor na padvindernan y Prome Minister Mike Eman pa sende e luznan cu ta ilumina e rotonde pa e temporada di fin di aña nos dilanti.
Esnan trahando riba e rotonde a haya bon cooperacion di personanan den bisindario. Asina por ehempel gerencia di Jaced Wheels a dicidi di decora henter e area dilanti nan negoshi pa haci e ambiente mas agradabel. No solamente Jaced Wheels, pero e negoshi Sweetlicious cu ta situa den bisindario di e rotonde tambe a duna nan cooperacion. Despues di e ceremonia di inauguracion, gerencia di Sweetlicious, a invita e padvindernan pa saboria un icecream cu waffle traha eynan mes mientras cu Subway tambe a brinda e hobennan un pan di e famoso cadena aki.
E tema di e decoracion riba e rotonde di Tanki Leendert ta “Green” ya cu a uza material di recicla pa crea e decoracionnan cu a laga un bunita impresion atras.
E siguiente rotondenan pa wordo inaugura ta esun di Belgiestraat, bou encargo di APA y Juliana School, y esun di Tarabana, door di Kooyman y studiantenan di Fatima College. Aunke tin 14 rotonde pa decora, e interes ta asina grandi cu tin 17 punto cu a wordo escogi pa keda decora. E Proyecto di Pasco ta un iniciativa di Gabinete Mike Eman I y a bira un custumber di fin di aña cu a sigui tambe den Gabinete Mike Eman II.
Expresionnan haci den e articulo aki no necesariamente ta refleha opinion di ArenaPoliti.co