E aña ’ki tabata e grupo di scout Sint Dominicus, kendenan a haya e honor pa demostra nan creatividad pa decora e prome rotonde di 2014 pa wordo inaugura. Rotonde di Tanki Leendert a keda sumamente bunita decora y a demostra e coperacion comunitario cu tin den comunidad di Aruba. Proyecto di Pasco di Gabinete Mike Eman II, realisa door di e departamento Servicio pa Comunidad y Bario (Team BoBario), ta un proyecto cu ta incentiva coperacion comunitario den comunidad y den e caso aki, grupo di Padvindernan St. Dominicus y patrocinador Subway, hunto cu bisiñanan a logra nan meta exitosamente pa e temporada di e fin di aña aki.

E ceremonia di inauguracion a wordo realisa door di Padvindernan y Prome Minister Mike Eman, kendenan a wordo compaña pa nan drumband.

Diabierna anochi, e grupo di Padvinder di St. Dominicus tabata protagonista di e ceremonia hunto cu e sponser principal Subway. E area a keda hopi bunita ya cu e negoshi na e skina, Jaced Wheels, tambe a decora su cura den ambiente di fin di aña cu figuranan decora cu luz y a cende e luznan den forma simultaneo cu esnan di e rotonde.

Akela, Sharline Tromp, a guia e muchanan di Sint Dominicus durante e dos siman di trabou cu a duna e area un bunita regalo pa fin di aña. A percura pa no lubida ningun persona cu a duna nan contribucion pa realisa e prome inauguracion di e diferente rotondenan rond Aruba cu lo wordo decora.

“Nos a traha como un team y mi ta hopi orguyoso di cada un di e chikito y grandinan cu a duna nan cooperacion, hunto cu nan mayornan.” E Akela a splica e inmenso trabou cu a wordo haci door di e grupo aki cu tabata entre lora of kibra mas cu 25 mil papel di corant. Tur e material aki a wordo uza pa traha e balanan cu tin colga, den e asina yama popchi di sneeuw colga na e cadushinan, den tur e imagennan y bestianan cu tin poni riba e rotonde. E papelnan aki a wordo uza como “vulling”. E papelnan di corant a wordo lora den forma di bala, gelijm y despues nan a wordo guma cu yuca harina.” Sra. Tromp a splica cu ora cu e parti aki a finalisa, e experto den trabou di body di auto, Randy Trimon a fliet nan cu verf, “clear” nan y despues a fura nan cu tela. “E muchanan aki y nan mayornan a traha dia y anochi pa cual nos ta apela na un y tur pa no destrui e trabou. Daño causa riba e rotonde, ta kibra trabou di un mucha cu a pasa oranan largo ta corta y lijm corant pa yega na e forma di e imagen y bestianan aki riba. Nan a trahe cu hopi dedicacion. Y nos ta contento cu Subway a confia nos pa haci e decoracion den nan nomber. Awe nochi nos por drumi trankil pasobra nos a tende cu nan a gust’e,” Akela Tromp a trece dilanti durante su gradecimento na esnan presente e anochi ey. El a recorda cu a tuma dos siman di trabou pa haci tur e decoracionnan cu ayudo di mayornan cu tin biaha a tuma liber pa keda cla na tempo. Akela Tromp tabatin masha palabra di gradicimento pa Rainbow y Randy Trimon, kendenan a pone nan cas disponibel pa haci e trabounan y a yuda hopi den creatividad. Pero tambe Chief, kende tabata e maestro di coriente y pone e tie-wrapnan. Otronan cu a coopera tabata Charrito Kelly, kende a pone su truck disponibel pa por e parti di decoracionnan na halto. Tambe e costurera ‘Oma Emy’ a wordo gradici pa e cose trahe di tur e figuranan cu ta decora e rotonde.

Tur producto cu a wordo uza den e proyecto aki ta recicla, pa cual e tema di e rotonde ta “Green”. Mundo di Scout e aña’ki tin e tema di “Messenger of Peace” pa cual a pone na e punto mas halto un pieza di “paloma” cu ta hiba e mensahe “Peace start with me”.

E rotonde di Tanki Leendert ta e prome pa wordo inaugura di e Proyecto di Pasco cu ta wordo coordina door di Team BoBario di Ministerio di Asuntonan General.

{lightbox href="/images/imagen/DSC_5917.jpg" title="Inauguracion Rotonde Tanke Leendert"}

Expresionnan haci den e articulo aki no necesariamente ta refleha opinion di ArenaPoliti.co