Dia 10 di juni 2015, Minister Sevinger a manda un carta pa Parlamento pa informa cu e proyecto di Green Corridor lo por supera e 292 miyon cu Parlamento a duna aprobacion pe na 2011. Esaki debi na inflacion y na gastonan cu ainda nan tipo y costo no por ser premira. Banco Central mes a calcula e gastonan pa e proyecto na 297 miyon. Un diferencia pa cual nos a cuestiona e mandatario. Pero durante e debate publico a sali na cla, cu Minister Sevinger via su Infra Team a mal informa Banco Central riba e gastonan real di e proyecto.

Infra Team di Minister Sevinger ta cambia cifra
Durante e debate publico diripiente a drenta un carta di Banco Central fecha 29 juni 2015, den cual Banco ta splica cu nan a wordo informa na 2013 pa e Infra Team di Minister Sevinger cu e proyecto di Green Corridor lo costa 297 miyon florin y lo mester paga bek segun calculo di Banco e suma di 29 miyon den 25 aña di tempo. Den e mesun carta Banco a splica dia 24 april 2015, e Infra Team a haci cambio drastico na e suma di inversion y a informa Banco cu ta 135 miyon lo costa pa traha e Green Corridor. Cu e cambio aki segun calculo di Banco, Gobierno lo mester paga entre 15 pa 16 miyon den 18 aña di tempo. Na final di e carta Banco a remaca pa buena marcha, cu Banco ta depende grandemente di e partidonan envolvi den e proyecto pa asina por haci su calculonan. Pues por medio di e carta Banco Central a mustra cu nan no a comete error den calculo, pero ta e Infra Team guia pa Minister Sevinger ta esnan cu a mal informa Banco Central riba e costo di e Green Corridor.

Gobernador, Parlamento, Hulanda, CFT y Pueblo a wordo mal informa
E mal informacion aki duna pa e Infra Team di Minister Sevinger tin como consecuencia cu hopi instancia cu ta haci uso di e cifranan di Banco Central, a wordo gaña. Un ehempel concreto ta cu e proyecion di Banco Central riba proyecto Green Corridor y e otro proyectonan PPP a wordo usa den e rapport di CFT di 29 december 2014 y e rapport aki na su turno a wordo usa pa Gobernador di Aruba, pa Parlamento di Aruba, pa e Conseho di Ministernan di Reino na Hulanda y mas cu claro pa CFT haci su propio proyeccionnan. E ta un berguensa cu awor ta resulta cu Minister Sevinger via di su Infra Team a sinta haci wega cu cifra y asina ta malinforma Pueblo di Aruba tambe.

Xiomara Maduro

Expresionnan haci den e articulo aki no necesariamente ta refleha opinion di ArenaPoliti.co