Pronto e ta wordo introduci na mas scol basico

ORANJESTAD – Prome Minister Mike Eman a keda hopi entusiasma despues cu diamars mainta el a mira con muchanan di 1ste te 6de klas di Fatima College a avansa den nan conocemento musical danki na un programa piloto di Team BoBario su funcionario Amado Rosina.

Diamars tabata cierre di e programa aki cu a cuminsa practicamente cu inicio di e aña escolar aki cu ta finalisando. E ta encera cu e mucha ta cuminsa cu enseñansa di notanan musical den 1ste klas, y cu cada klas e conocemento ta sigui aumenta te ora cu den 6de klas por pone esaki den practica creando tononan musical (melodia). Esaki ta loke Prome Minister Eman a mira tambe ora cu el a pasa den cada klas cu a duna un demostracion chikito di loke nan a siña. “Nos ta hopi contento y orguyoso di Fatima College cu a tuma e oferta di Amado Rosina y a brasa e idea aki,” Eman a comenta na final di su bishita.

E idea pa e programa aki a nace despues cu den e programa di BoBario a pensa riba diferente actividadnan cu kier organisa den barionan di Aruba y “nos a haya inspiracion for di e orkesta Nacional di Venezuela cu ta un programa cu a wordo desaroya den tur e barionan, desaroya e talentonan musical di e hobennan. Scogiendo e hobennan cu a resalta, a forma e Orkesta Nacional di Venezuela.” El a agrega cu el a comenta su pensamento cu Amado Rosina, kende ya caba tabata cana cu e idea pa haci algo na formacion musical di hobennan di Aruba, principalmente na scolnan. ”Nos a pone Amado Rosina di Team BoBario disponibel pa e programa pasobra nos ta kere cu e ta algo sumamente bunita,” Eman a comenta.

Prome Minister a recorda cu e tabata presente na inicio di e programa, con a splica e muchanan e base di notanan y “awe nos por a mira con despues di un aña escolar con e muchanan ta domina henter e tema dificil aki”. Pesey e mandatario a expresa na e ocasion aki cu e ta hopi orguyoso cu un persona cu asina hopi talento manera Amado Rosina, a duna su contribucion pa ehecuta e programa aki.

Durante tres luna, el a sinta cu e maestronan pa siñanan loke nan mester a pasa over pa e studiantenan. Pa esaki ta logra cu e hobennan den scol basico ta haya seis aña di preparacion teoretico, banda di practica, cu ta haci cada un di e hobennan aki mas grandi.

Prome Minister Eman tabata hopi entusiasma y kier mira cu esaki ta pasa over pa tur scol basico, principalmente pasobra e resultado di e prome aña ta grandi. “Bo ta mira esaki den wowo di e muchanan cu ta briya ...,” e mandatario a splica.

Expresionnan haci den e articulo aki no necesariamente ta refleha opinion di ArenaPoliti.co